საქართველოს იურისტთა ასოციაციის აჭარის ფილიალის ხელმძღვანელის, თამარ წულუკიძის ინფორმაციით, ბათუმის პორტში საპროტესტო აქციაზე დაკავებულებს შორის არის ბექა გრიგორიადისი, ლაზარე გრიგორიადისის მამა.
21 წლის ლაზარე გრიგორიადისი პოლიციამ 29 მარტს ღამით დააკავა, სადაც მოქალაქეები რუსულ კანონს აპროტესტებდნენ.
მას პოლიციელთა მიმართ ძალადობასა და შსს-ს კუთვნილ ავტომობილზე ცეცხლის წაკიდებას ედავებიან. დაკავებულს 7-დან 11 წლამდე პატიმრობა ემუქრება. 31 მარტს მას სასამართლომ წინასწარი პატიმრობა შეუფარდა.
ბათუმში მიმდინარე აქციაზე, სადაც რუსეთიდან საკრუიზო გემის შემოსვლას აპროტესტებენ, სულ 23 ადამიანი დააკავეს.
საიას ინფორმაციით, დაკავებულებს შორის ასევე არიან გენრი დოლიძე – „დროას“ ბათუმის ორგანიზაციის ხელმძღვანელი, გიორგი გველესიანი, ირაკლი ხარჩილავა, ხათუნა ბერიძე, ირაკლი მეტრეველი, ლუკა წულაძე.
საიას ინფორმაციით, 6 დაკავებული ბათუმში ჰყავთ,ზოგიერთი მათგანი გადაიყვანეს ოზურგეთში, შესაძლოა ასევე ზუგდიდსა და ფოთის განყოფილებებში.
