დღეს, 27 ივლისს, ბათუმის ნავსადგურში საპროტესტო აქცია მიმდინარეობს რუსეთიდან, ქალაქ სოჭიდან გამოსულ საკრუიზო გემთან.
აქციის მიმდინარეობისას, დაახლოებით 21 საათზე, გემი გავიდა ბათუმის ნავსადგურიდან.
ბათუმში დღეს აქცია და მოქალაქეების აღშფოთება გამოიწვია როგორც სოჭიდან გამოსული გემის ბათუმის პორტში შემოსვლამ, ასევე, გემზე მყოფი რუსი ტურისტების სატელევიზიო კომენტარებმა, რომელშიც ისინი ამბობდნენ, რომ რუსეთი არ არის ოკუპანტი, „ჩვენ ისევ საბჭოთა კავშირში ვართ“, ხოლო ერთ-ერთმა ტურისტმა ღიად განაცხადა, რომ ნამყოფია აფხაზეთში, რაც არის ოკუპირებული ტერიტორიების შესახებ კანონის დარღვევა.
აქცია ბათუმში დღეს დაანონსდა და საღამოს 20 საათზე ნავმისადგომთან მოქალაქეები შეიკრიბნენ.
„Русский корабль, иди на **й“, „აფხაზეთი საქართველოა“ – ისმოდა აქციაზე. მოქალაქეებმა აქციაზე მიიტანეს აფხაზეთის და აგვისტოს ომის ამსახველი ფოტოკადრები. ჩართეს საქართველოს ჰიმნი.
აქციის მიმდინარეობისას გემის ერთ-ერთი კაიუტიდან რუსეთის დროშა გამოფინეს, თუმცა მალევე ჩახსნეს.
აქციის დაწყებიდან ერთ საათში გემმა ნავსადგური დატოვა.
ნახეთ „ბათუმელების“ ფოტორეპორტაჟი აქციიდან:
