ბათუმში, ბაგრატიონის ქუჩაზე, გზაგამყოფ სივრცეში სკვერის მოსაწყობად მერიამ ბიუჯეტში 500 000 ლარი გაითვალისწინა. განმარტებითი ბარათის მიხედვით, მერია აქ სკვერის მოწყობას 3 საკადასტრო ერთეულზე გეგმავს.
ბაგრატიონის ქუჩას ჟიული შარტავას ქუჩის კვეთიდან სელიმ ხიმშიაშვილის ქუჩის კვეთამდე კარგად გამწვანებული სივრცე ყოფს. მისი ფართობი საერთო ჯამში ერთ ჰექტრამდე [9586 კვ.მეტრი] სამ ნაკვეთს მოიცავს. მერიის ინფორმაციით, პროექტი 2024 წელს უნდა დასრულდეს.
მონიშნულია გამყოფი ზოლი, სადაც მერია სკვერის მოწყობას გეგმავს.
გზაგამყოფი ზოლი, სადაც მერია სკვერის მოწყობას გეგმავს.
მწვანე სივრცის შენარჩუნება და ნარგავების დამატება ამ უბნის მცხოვრებებისთვის მნიშვნელოვანი პროექტია. ეს საკითხი საინიციატივო ჯგუფმა 2021 წელს შეისწავლა და ბათუმის საკრებულოს პეტიციით მიმართა ამ და სხვა მწვანე სივრცეებისთვის სკვერის სტატუსის მინიჭების მოთხოვნით.
ბაგრატიონის ქუჩის 138-ში მდებარე კორპუსის უკან, ბაგრატიონის ქუჩის მხარეს, კიდევ ერთი მწვანე სივრცე, დაურეგისტრირებელი ფართობია, სადაც მოსახლეობა სკვერის მოწესრიგებას და საბავშვო ატრაქციონების განთავსებას ითხოვს.
საკრებულოს გასულ სხდომაზე, რომელიც 21 ივლისს შედგა, ბაგრატიონის ქუჩა მხოლოდ გზაგამყოფი ზოლის გამწვანების პროექტთან მიმართებაში არ უხსენებიათ. ბათუმის მერმა არჩილ ჩიქოვანმა უკვე მესამედ გამოხატა წყენა ამ ქუჩაზე სარეაბილიტაციო სამუშაოების გაჭიანურებისთვის მერიის კრიტიკის გამო.
ქუჩის რეაბილიტაციის დაუსრულებელ პროცესზე შეწუხებული მოსახლეობა საუბრობდა. მოქალაქეების ინფორმაცია მერიის საჯარო განცხადებებითა და „ბათუმელების“ მიერ მოპოვებული დოკუმენტებითაც დასტურდება – ბაგრატიონის ქუჩის რეაბილიტაცია 2014 წლიდან დაიწყო და ამ დრომდე არ დასრულდა. სამუშაოებისთვის მინიმუმ 23 მილიონი ლარი და 16 მილიონი ევრო დაიხარჯა. ამ პერიოდის განმავლობაში ქალაქის სამი მერი შეიცვალა.
ბათუმის მერმა ბაგრატიონის ქუჩის რეაბილიტაციის პროცესთან დაკავშირებით ადრეც აღნიშნა, ხოლო საკრებულოს ბოლო სხდომაზე პირდაპირ განაცხადა, რომ მედიამ აწყენინა. მან არ დაასახელა, თუმცა თითქმის დააკონკრეტა ისიც, რომელ მედიას გულისხმობდა.
არჩილ ჩიქოვანის განმარტებით ეს ტელევიზიებს არ ეხება:
„საინტერესო და სასიამოვნო იქნებოდა ადგილობრივ ტელევიზიებთან ერთად, რომლებიც ობიექტურად აშუქებენ და განსაკუთრებით საზოგადოებრივი მაუწყებელი, იმ არსებულ გამოწვევებს, რაც ქალაქს და ჩვენს თანამოქალაქეებს გააჩნიათ… ცოტა საერთაშორისო პლატფორმებზეც გავიხედოთ, მისასალმებელია მგონი და მოსალოცი ამბავი, რომ „დოიჩე ველე“ „ევრონიუსი“ „ბიბისი“ და სხვა პლატფორმები ჩვენს ქალაქს და ჩვენს რეგიონს აღიარებენ, როგორც წამყვან ტურისტულ მიმართულებას“.
ნათქვამის საილუსტრაციოდ მერმა „ბათუმის სტადიონის“ ჯილდო დაასახელა. შემდეგ კი ბაგრატიონის ქუჩის ჯერიც დადგა:
„რა თქმა უნდა, აღარავინ საუბრობს ახლა, აღარავის აღარ აინტერესებს, არ არის აქტუალური. აივლით-ჩაივლით ბაგრატიონის ქუჩაზე და ალბათ გსიამოვნებთ, რომ კეთილმოწყობილია, მაგრამ წინა საკრებულოზე და წინა წლებში ძალიან აქტუალური იყო, რომ ვერასდროს ვერ მთავრდება, არასდროს არ მთავრდებოდა და არ გვახსოვს სატენდერო პროცედურები, გამჭვირვალედ ჩატარებული ტენდერი და პასუხისმგებლობები, რომელიც უნდა ჰქონდეს იმ კომპანიას, რომელიც აწარმოებს სამუშაოებს, ხარისხიანად რომ შეასრულოს. ამის უგულებელყოფა ხდებოდა და პირდაპირი იერიში იყო მუნიციპალურ სამსახურებზე“.
პირველ ჯერზე კი მერმა თქვა, რომ სოციალურმა მედიამ ისე წარმოაჩინა ამბავი, თითქოს ბაგრატიონის ქუჩის რეაბილიტაცია სიუჟეტის მომზადების შემდეგ დაიწყო.
იმავე სხდომაზე ბათუმის მერს ქალაქში არსებულ ბევრ გამოწვევაზე, მათ შორის ბავშვთა ატრაქციონების უსაფრთხოებაზე და სხვა ბევრ თემაზე ჰკითხეს. მან თქვა ისიც, რომ არ აქვს ილუზია, რომ ყველაფერი იდეალურადაა.
„ბუნებრივია, ჩვენ არ გვაქვს ილუზია, რომ ყველაფერი იდეალურად არის და რაიმე გამოწვევები არ აქვს ამ ქალაქს. ბუნებრივია, ყველა დიდ ქალაქს, მათ შორის ეკონომიკურად მზარდ ქალაქებს, აქვს ამ ტიპის გამოწვევები“ – თქვა არჩილ ჩიქოვანმა.
იმავე სხდომაზე ბიუჯეტში ცვლილება დაამტკიცეს.
ამავე თემაზე:
ბათუმის ბიუჯეტი 23 მილიონით იზრდება – როგორ გადანაწილდება თანხა
