დღეს, 21 ივლისს, გენერალურმა პროკურატურამ დაადასტურა ქობულეთში 19 წლის ბიჭის მკვლელობაში ბრალდებული ა.ბ.-ს გაერთიანებულ სამეფოში დაკავების ფაქტი.
ქობულეთში მოკლული 19 წლის გიორგი ალხანიშვილის დედამ, მარინა მაძღარაშვილმა „ბათუმელებს“ 19 ივლისს უთხრა, რომ მკვლელობაში ბრალდებული უკვე დაკავებულია. 19 ივლისს „ბათუმელებს“ პროკურატურაში ბრალდებულის დაკავების შესახებ ინფორმაცია არ მოაწოდეს.
გენერალური პროკურატურის ინფორმაციით, საქართველომ გაერთიანებული სამეფოს კომპეტენტურ უწყებას ბრალდებულის ექსტრადიციის შუამდგომლობით 2023 წლის 14 ივნისს მიმართა და შესაბამისი მასალები მიაწოდა.
„პროკურატურის მიერ წარდგენილი დოკუმენტაციის საფუძველზე და გაერთიანებული სამეფოს შესაბამისი სამსახურების მიერ გაწეული საქმიანობის შედეგად, ვესტმინსტერის მაგისტრატი მოსამართლის ბრძანების საფუძველზე დანაშაულის ჩამდენი პირი 2023 წლის 16 ივლისს დააკავეს და მას საექსტრადიციო პატიმრობა შეეფარდა.
საქართველოს შინაგან საქმეთა სამინისტროს მიერ ჩატარებული გამოძიების შედეგად დადგინდა, რომ ბრალდებულმა 2023 წლის 18 მაისს ქობულეთის მუნიციპალიტეტში, ურთიერთშელაპარაკების ნიადაგზე, დანით სხეულის სხვადასხვა არეში მრავლობითი დაზიანება მიაყენა დაზარალებულს, რომელიც მიღებული დაზიანებების შედეგად გარდაიცვალა.
აღნიშნულის შემდგომ ბრალდებულმა თანმხლებ პირებთან ერთად გვამი დაუსახლებელ ადგილას დამარხა და შემთხვევის ადგილიდან მიიმალა,“ – აღნიშნულია გენერალური პროკურატურის მიერ დღეს, 21 ივლისს, გავრცელებულ განცხადებაში.
ამ ეტაპზე მიმდინარეობს საექსტრადაციო პროცედურები.
ამავე სისხლის სამართლის საქმეზე ბრალდებულია კიდევ 6 პირი: მკვლელობაში ბრალდებულის მამა, 2 ბიძა და 3 მეგობარი. მათგან ოთხს განსაკუთრებით მძიმე დანაშაულის შეუტყობინებლობას ედავებიან; ერთს – განსაკუთრებით მძიმე დანაშაულის დაფარვას; ერთს – გამოსაკითხ პირზე განხორციელებულ ზემოქმედებას.
ამ საქმეზე ბრალდებულია სასულიერო პირიც – გელა ბაჟუნაიშვილს, მამა იობს, გამოძიება დანაშაულის შეუტყობინებლობას ედავება. სხვა ბრალდებულებისგან განსხვავებით, სასულიერო პირი სასამართლომ გირაოს საფუძველზე გაათავისუფლა.
ამ თემაზე:
19 წლის ბიჭის მკვლელობის საქმის დეტალები, რომელშიც სასულიერო პირიც ფიგურირებს
