ბათუმის ბულვარის ადმინისტრაციამ ძველ ბულვარში არსებული სავარჯიშო მოედნების რეაბილიტაციაზე ტენდერი გამოაცხადა. სატენდერო თანხა 404 ათას 68 ლარია.
პირობის მიხედვით, მოედნების რეაბილიტაციასთან ერთად, მიმწოდებელმა სხვადასხვა სახის 15 ახალი ტრენაჟორიც უნდა დაამონტაჟოს.
„პროექტში ჩადებულია უმაღლესი ხარისხის სავარჯიშო კომპლექტები, რომლებიც უძლებენ ნებისმიერ ბუნებრივ ზეწოლას, მათი უპირატესობა მდგომარეობს იმაში, რომ ისინი არა საკუთარ წონაზე სავარჯიშოდ გამოიყენებიან, არამედ შესაძლებელს ხდიან მსურველებმა სხვადასხვა სასურველ წონაში ივარჯიშონ.
გათვალისწინებულია ასევე სავარჯიშო კომპლექტები შეზღუდული შესაძლებლობის პირებისთვის“ – აცხადებს ბულვარის ადმინისტრაცია.
ტრენაჟორები ბულვარში დღეს / ფოტო ტენდერიდან
პროექტის მიხედვით:
- „საპროექტო ტერიტორია ცენტრალურ ბულვარში მოიცავს რამდენიმე ლოკაციას. პროექტი გულისხმობს არსებული სავარჯიშო სივრცეების მოდერნიზებას და მისი ახალი თანამედროვე ტიპის სავარჯიშო კომპლექტებით აღჭურვას.
- პროექტი ლოკაციების მიხედვით ინდივიდუალური და განსხვავებულია, მაგრამ ჯამში ქმნის საერთო ხელწერას და განწყობას.
- კონსტრუქციული ნაწილი წარმოადგენს მილკვადრატებისგან შემდგარ კონსტრუქციას, რომელიც ლითონის მილებზე არის დაყრდნობილი, თავის მხრივ, ლითონის მილები ჩამაგრებულია რკინაბეტონის ფილებში, რათა თავიდან იქნეს აცილებული მისი დაზიანება ბუნებრივი ზეწოლების შედეგად;
- სავარჯიშო სივრცის იატაკი წარმოადგენს რკინაბეტონის ფილაზე მოჭიმულ კაუჩუკის ფენილს, რომელიც ასევე კაუჩუკის ბორდიურით არის შემოფარგლული. სახურავი წარმოადგენს ორგმინას, რომელიც შესაბამისი სამაგრებით არის დამაგრებული ლითონის კონსტრუქციაზე.
- სავარჯიშო სივრცე განათებულია ინდუსტრიული სანათებით, შესაბამისად, მსურველებს შეუძლიათ ივარჯიშონ დღის ნებისმიერ მონაკვეთში.“
ტენდერში წინადადებების მიღება დაიწყება 2023 წლის 5 აგვისტოს და 10 აგვისტოს დასრულდება.
„ბათუმის ბულვარში არსებული სავარჯიშო მოედნების რეაბილიტაცია უნდა განხორციელდეს ეტაპობრივად, ხელშეკრულების გაფორმებიდან 90 კალენდარული დღის განმავლობაში“, – აღნიშნულია პირობაში.
ბულვარის სავარჯიშო მოედნების ვიზუალიზაცია / ფოტო ტენდერიდან
ბულვარის ადმინისტრაციის მოთხოვნაა ასევე, რომ ტენდერში მონაწილე პრეტენდენტს „2020 წლის პირველი იანვრიდან ტენდერის გამოცხადების თარიღამდე შესრულებული უნდა ჰქონდეს:
ტენდერით გათვალისწინებული ანალოგიური ხასიათისა და შინაარსის სავარჯიშო მოედნების მშენებლობა-რეაბილიტაციის სამუშაოები, ტრენაჟორების მიწოდება-მონტაჟით ან/და დასასვენებელი ან/და გასართობი პარკების ან/და სკვერების მშენებლობა-რეაბილიტაცია, მათ შორის ტრენაჟორების მიწოდება-მონტაჟით ან/და ღია სპორტული მოედნების მშენებლობა-რეაბილიტაცია ან/და გარე გამოყენების ტრენაჟორების მიწოდება-მონტაჟით, საერთო ღირებულებით არანაკლებ 1 010 170 ლარის ოდენობით.“
ბულვარის ადმინისტრაციაში „ბათუმელებს“ ორი კვირის წინ უთხრეს, რომ ახალი ტრენაჟორების შეძენაზე ტენდერს 6 ივლისს გამოაცხადებდნენ, თუმცა ტენდერი ბულვარმა 20 ივლისს გამოაცხადა.
რატომ არ გამოაცხადეს ამ დრომდე ტენდერი? – ამ კითხვაზე პასუხად ბულვარის ადმინისტრაციიდან მოგვწერეს, რომ „სატენდერო დოკუმენტაცია დამუშავების პროცესში იყო“.
მიმდინარე ტენდერის პირობის მიხედვით, ლითონის კონსტრუქციის საგარანტიო ვადა საბოლოო მიღება-ჩაბარების აქტის გაფორმებიდან შეადგენს არანაკლებ 5 წელს; ხოლო ტრენაჟორებისა და კაუჩუკის საფარის საგარანტიო ვადა – არანაკლებ 2 წელს.
ბულვარში დღეს არსებული ტრენაჟორები ძირითადად რუსული წარმოებისაა და ისინი, დაახლოებით 5 წლის წინ, 2017 წლის ნოემბრის ბოლოს, ბულვარმა 78 692 ლარად შეიძინა „ჯეო-პარკისგან“.
ამ თემაზე „ბათუმელების“ არქივიდან:
რუსული კომპანიების ფილიალები, რომლებიც ტენდერებში იმარჯვებენ
