„მტვერში ვიხრჩობით, გაუსაძლისია ცხოვრება, დღეში ერთხელ მორწყონ მაინც! ზუსტად სამი თვეა, რაც არ მოურწყავთ, ზაფხულში მაინც მორწყონ,“ – ამბობს შოთა ბერიძე, რომელიც ხელვაჩაურში, სოფელ სალიბაურში ბათუმის შემოვლითი გზის მშენებარე მაგისტრალის ქვეშ ცხოვრობს.
მოქალაქეებმა, რომლებსაც ცხოვრება სალიბაურში, მაგისტრალის ქვეშ უწევთ, დღეს, 18 ივლისს, გზის გადაკეტვა სცადეს. ისინი აპროტესტებენ მაგისტრალზე მომუშავე მძიმე ტექნიკის გადაადგილების მაშინ, როცა გზა არ ირწყვება და მტვერია.
მოქალაქეების თქმით, გზა გადაიკეტა თუ არა, ადგილზე პოლიცია მივიდა და მძიმე ტექნიკამ მაშინვე მუშაობა შეაჩერა.
„…გზა გადავკეტეთ თუ არა, პოლიციელები მოვიდნენ მაშინვე, გვითხრეს, რომ ველაპარაკეთ კომპანიას და ვეღარ გააგრძელებენ მუშაობას, ვიდრე გზა არ მოირწყვებაო, ამიტომაც, დავიშალეთ, აუკრძალეს პოლიციელებმა კომპანიას მუშაობა“ – გვიყვება შოთა ბერიძე და აღწერს მშენებარე მაგისტრალის ქვეშ მცხოვრები ოჯახების პრობლემას როგორ დაემატა მტვრის, ანუ ჰაერის დაბინძურების პრობლემა – აქ მცხოვრები ადამიანები აქამდეც ჰყვებოდნენ იმ ზიანზე, რაც მათ საცხოვრებელ გარემოს მიადგა, მათ შორის, სახლებს, სადაც ბზარები გაჩნდა.
„ჩვენ არ ვართ მაგისტრალის მშენებლობის წინააღმდეგი, მაგრამ აქ მოძრაობა არ ჩერდება, მუდმივად ეზიდებიან მიწას და ხრეშს, აივანზე დაჯდომას ვინღა ამბობს, ფანჯარასაც ვერ გამოაღებ, სარეცხს ვერ გაფენ, ბავშვები მტვერში იხრჩობიან,“ – გვიყვება შოთა ბერიძე.
შოთა ბერიძე
მოქალაქეების თქმით, ამ დრომდე აქ არავის შეუსწავლია სახლის ბზარები და სხვა ზიანი, რაზეც მოსახლეობა წლებია საუბრობს, მას შემდეგ, რაც ბათუმის შემოვლითი გზის მშენებლობა დაიწყო.
ბათუმის შემოვლით გზას თურქული კომპანია POLAT YOL & MAPA აშენებს. მაგისტრალის მშენებლობა რამდენჯერმე გადავადდა. ეს სამუშაო 2020 წელს უნდა დასრულებულიყო, რაც ვერ მოხერხდა. ბოლო მონაცემებით, შემოვლითი გზის მშენებლობა 2023 წელს უნდა დასრულდეს.
მშენებარე გზა
ფოტო: „ბათუმელები“/გურამ მურვანიძე
„ის ტექნიკა გაფუჭდა, რითაც ვრწყავდით გზას, მალე გარემონტდება და მოირწყვება,“ – უთხრა „ბათუმელებს“ რომან პატარიძემ, კომპანიის „ფოლატის“ საზოგადოებასთან ურთიერთობის მენეჯერმა. მან გვითხრა, რომ სამუშაოები არ შეჩერებულა და მძიმე ტექნიკა ახლა იმიტომ გაჩერდა, რომ შესვენების დროა.
„დღეში რამდენჯერმე ვრწყავთ ამ გზას, გუშინ გაფუჭდა ეს ტექნიკა, მოვრწყავთ და გაგრძელდება დღესვე სამუშაოები,“ – დასძინა რომან პატარიძემ.
კომპანიაში რომ ჩვენი მოტყუება სცადეს, ამას ხელვაჩაურის მერიის რწმუნებულის კომენტარი აჩვენებს:
„არ ვიცი, რამდენი ხანია არ მოურწყავთ გზა, მაგრამ მათ პირობა დადეს რამდენჯერმე, რომ მორწყვის პრობლემა არ იქნებოდა, შემდეგ გაირკვა, რომ მორწყვის ტექნიკაზე ჰქონდათ პრობლემა, მათივე გადმოცემით, საჯარიმოზეა გადაყვანილი მორწყვის ტექნიკა.
ამ მომენტისთვის სამუშაოები შეაჩერებინა კომპანიას პოლიციამ, ვიდრე მორწყვის პრობლემა არ მოგვარდება. მე დღეს ველაპარაკე კომპანიის წარმომადგენლებს და მითხრეს, რომ პრობლემას მალე მოაგვარებენ. როგორ მოაგვარებენ, არ ვიცი,“ – გვითხრა გელა ცინცქილაძემ, ხელვაჩაურის მერის რწმუნებულმა სოფელ ქვედა სალიბაურში.
