ხელვაჩაურის საკრებულომ მუნიციპალიტეტის ტერიტორიაზე ავტომანქანების პარკირების მარეგულირებელი ნორმების, პარკირების ადგილების განსაზღვრისა და ავტომანქანების პარკირების ახალი წესი დაამტკიცა, რომელიც 2023 წლის 28 ივნისიდან ამოქმედდა.
არის თუ არა მონიშნული მუნიციპალიტეტში პარკირების საერთო და სპეციალური ადგილები ან/და განსაზღვრულია თუ არა ის ადგილები, სადაც მერია მომავალში პარკირების ადგილებს მოაწყობს? – ამ კითხვაზე პასუხად ხელვაჩაურის მერიაში „ბათუმელებს“ უთხრეს, რომ პარკირების ადგილების მონიშვნა დაგეგმილია და მერიას განსაზღვრული აქვს ის ადგილები, სადაც პარკინგს მოაწყობს.
ამ საქმისთვის [მონიშვნა, სპეციალური ნიშნების განთავსება და სხვ.] ხელვაჩაურის 2023 წლის ბიუჯეტში თანხა გათვალისწინებული არ არის.
„2024 წლის ბიუჯეტში დაიგეგმება აუცილებლად, თუმცა, რა თანხა იქნება საჭირო, ვერ გიპასუხებთ“, – მოგვწერეს მერიიდან.
მერიას ასევე ვკითხეთ, თუ ხელვაჩაურში პარკირებისთვის გამოყოფილი ადგილები არ არსებობს, მაშინ რა აზრი ჰქონდა ამ წესის სრულად ამოქმედებას გამოქვეყნებისთანავე? – „შევიმუშავეთ კანონმდებლობა, დავამტკიცეთ, მივიღეთ ნორმატიული აქტები და შემდგომში მოეწყობა ადგილებიც“, – მოგვწერეს მერიიდან.
ხელვაჩაურის საკრებულომ მუნიციპალიტეტის ტერიტორიაზე პარკირების საერთო ადგილებით და პარკირების სპეციალური ადგილებით სარგებლობის საფასურიც დაამტკიცა.
პარკირების საერთო ადგილებით სარგებლობის საფასურია:
- 1 დღე – 10 ლარი;
- 7 დღე – 20 ლარი;
- 30 დღე – 30 ლარი;
- 182 დღე – 45 ლარი;
- 365 დღე – 60 ლარი.
რაც შეეხება ტაქსებისთვის პარკირების ადგილებით [პარკირების სპეციალური ადგილები] სარგებლობის საფასურს, დღეების მიხედვით შეადგენს:
- 10 დღე – 10 ლარი;
- 20 დღე – 20 ლარი;
- 30 დღე – 30 ლარი.
პარკომეტრებით აღჭურვილი პარკირების საერთო ადგილებით სარგებლობის საფასური არის:
- 1 საათამდე პერიოდი – 50 თეთრი;
- 2 საათამდე პერიოდი – 1 ლარი;
- ყოველი შემდეგი 1 საათი – 1 ლარი.
სატვირთო ავტომობილებისა და სპეცტექნიკის პარკირებისთვის [სპეციალური ადგილები]:
- 1 დღე – 3 ლარი;
- 30 დღე – 30 ლარი;
- 182 დღე – 150 ლარი;
- 365 დღე – 250 ლარი.
„პარკირების საფასურის გადახდა განხორციელდეს ოპერატორის მიერ შერჩეულ კომერციულ ბანკში“, – აღნიშნულია დადგენილებაში.
მერიის განმარტებით, ხელვაჩაურში პარკირების საფასურის გადახდა ნებისმიერ კომერციულ ბანკში იქნება შესაძლებელი. პარკირების საფასური ირიცხება მუნიციპალიტეტის ბიუჯეტში.
პარკირების ორგანიზებას და პარკირების საფასურის ამოღებას კი, ხელვაჩაურის მუნიციპალური ინსპექცია უზრუნველყოფს.
პარკირების საფასურის გადახდა მიმდინარე წლის თებერვლიდან დღემდე პრობლემაა ბათუმის ტერიტორიაზე.
მერიის „ავტოტრანსპორტის“ ინფორმაციით, საფასურის გადახდა 2023 წლის პირველი ივლისიდან იქნება შესაძლებელი:
რუსულნომრიან მანქანებს ვერც ბათუმის მუნიციპალური ინსპექცია აჯარიმებს
