„სხვა დროისთვის რომ იცოდეთ, კიდევ ერთხელ: ჩვენი ჯარისკაცები გმირები არიან, იყვნენ და იქნებიან, ლაჩარი თქვენი ბელადი სააკაშვილია“, – ასე გამოეხმაურა დღეს, 16 ივნისს, ფეისბუქზე აჭარის მთავრობის თავმჯდომარე, თორნიკე რიჟვაძე მის მიმართ კრიტიკას, რომელიც გამომწვევიც გახდა 2008 წლის ომის მისამართით ნათქვამი მისივე სიტყვები „ლაჩრულად წაგებული ომი“.
კერძოდ, 15 ივნისს, აჭარის უმაღლეს საბჭოში თორნიკე რიჟვაძემ ოპოზიციის მიერ რუსეთის მოქალაქეების საქართველოში შემოსვლის გაზრდილ მაჩვენებელზე დასმული კითხვის პასუხად თქვა:
„…გაორმაგებულია როგორც ვიზიტორების რაოდენობა, ასევე, შემოსავლების მოცულობა და მინდა გითხრათ, რომ ამ საერთო ხვედრით წილში მათ შორის იმ ქვეყნის მოქალაქეებიცაა, რომლებსაც 2008 წელს, ლაჩრულად წაგებული ომის შემდგომ, სააკაშვილის ხელისუფლებამ მწვანე აუნთო, უვიზო რეჟიმი დაუწესა და ყვავილებით, ქართული ღვინით ხელში ეგებებოდა“.
რიჟვაძის ამ შეფასებას მწვავე კრიტიკა მოჰყვა სოციალურ ქსელებში მოქალაქეების, აგვისტოს ომის ვეტერანების და პოლიტიკოსების მხრიდან. რიჟვაძეს ბოდიშის მოხდისკენ მოუწოდა პარლამენტარმა ალეკო ელისაშვილმა, საქართველოს ყოფილი სახალხო დამცველი, ნინო ლომჯარია კი ასე გამოეხმაურა რიჟვაძის ციტატას: „კაცი, რომელსაც უკრაინაში ომი ვინ დაიწყო იმის თქმის ეშინია, ლაჩრებს ეძახის რუსეთთან ნაომარ ხალხს“.
მოწოდების მიუხედავად თორნიკე რიჟვაძეს ბოდიში არ მოუხდია და არც ვრცელი კომეტარი გაუკეთებია ამ თემაზე. იმის განმარტება, თუ რა იგულისხმა აჭარის მთავრობის თავმჯდომარემ, თავის თავზე აიღეს აჭარის უმაღლესი საბჭოს დეპუტატებმა „ოცნებიდან“ – ლადო მგალობლიშვილმა და ტიტე აროშიძემ.
მგალობლიშვილმა რიჟვაძის ციტატას „კონტექსტიდან ამოგლეჯილი“ უწოდა და თქვა, სინამდვილეში რა იგულისხმა რიჟვაძემ:
„მთავრობის თავმჯდომარემ გუშინ იგულისხმა მაშინდელი პრეზიდენტის, მიხეილ სააკაშვილის ლაჩრული ქმედება ომის დროს, კონკრეტულად საუბარი იყო გორის ინცინდენტზე. და ასევე, იმავე კონტექსტში იყო ამ ომის შემდეგ, როდესაც მიხეილ სააკაშვილმა აღადგინა, გააუქმა სავიზო რეჟიმი რუსეთთან და აღდგა უვიზო მიმოსვლა. ზუსტად ეს კონტექსტი იყო თავიდან ბოლომდე“.
დეპუტატმა ტიტე აროშიძემ კი დააზუსტა, რომ მთავრობის თავმჯდომარე გულისხმობდა არა მხოლოდ სააკაშვილს, არამედ მის გუნდსაც.
„აქ მიხეილ სააკაშვილზე კი არ იყო მხოლოდ საუბარი, მიხეილ სააკაშვილის იმდროინდელ გუნდზე. ეს იყო კეზერაშვილი, ეს იყო უგულავა, ეს იყო მერაბიშვილი, რომლებიც თავისი სიმხდალით ცდილობდნენ გაემართლებინათ შემდგომ ის სიტუაცია, რომელ სიტუაციაშიც აღმოჩნდა მთლიანად საქართველო.
ჩვენ, რა თქმა უნდა, ვაფასებთ იმ გმირებს და თითოეული ქართველის გულში მათ ღირსეული ადგილი უჭირავთ და ჩვენ ვამაყობთ იმ ისტორიით, რომელიც ჩვენ გვაჩვენა იმ გმირმა ბიჭებმა არა მხოლოდ 2008 წელს. მცდელობა იმისა, რომ ნაციონალურმა მოძრაობამ წარმოაჩინოს, თითქოს მთავრობის თავმჯდომარემ სიმხდალე უწოდა და ლაჩარი უწოდა იმ ადამიანებს, ეს არის სრული სიცრუე“, – განაცხადა ტიტე აროშიძემ.
უკვე მეორე წელია რიჟვაძის უმაღლეს საბჭოში მისვლა სკანდალით სრულდება. გასულ წელს აჭარის მთავრობის თავმჯდომარემ ოპოზიციას მიმართა სიტყვებით – „ვერავის გადაუღუნოთ, დავაი, დაახვიეთ“.
