აჭარის უმაღლესმა საბჭომ 2024 წლის ბიუჯეტის პროექტი დაამტკიცა და საკუთარი დაფინანსება სამომავლოდ, 7 მილიონ 25 ათას 800 ლარით განსაზღვრა.
ეს იმ შემთხვევაში, თუ ტექნიკურ ხარვეზს არ გავითვალისწინებთ, ვინაიდან, უკვე დამტკიცებულ დადგენილებაში არა 7 მილიონი, არამედ 7 მილიარდია ჩაწერილი:
უმაღლესი საბჭოს დადგენილებიდან
ამ ჩანაწერში „ათასი“ ზედმეტია. ანალოგიური მცდარი ჩანაწერი იყო დადგენილების პროექტშიც, რომელიც უმაღლესი საბჭოს ბიუროს საფინანსო-საბიუჯეტო და ეკონომიკურ საკითხთა კომიტეტმა 2023 წლის 30 მაისს წარუდგინა.
ამის შემდეგ, წესით, პროექტს ბიუროც განიხილავდა და 12 ივნისის სხდომაზე მესამე მოსმენით, 13 ხმით მიიღეს კიდეც, თუმცა ამ მცდარი ჩანაწერისთვის ყურადღება, გამოდის, არავის მიუქცევია.
დადგენილება საკანონმდებლო მაცნეზე 15 ივნისს გამოქვეყნდა, თუმცა ის მიღებისთანავე, ანუ 12 ივნისს ამოქმედდა.
უკვე ამოქმედებულ დადგენილებაში, მილიარდი უმაღლესმა საბჭომ მილიონით უნდა ჩაასწოროს. დადგენილების მიღების შემდეგ ერთი სხდომა კიდევ ჩატარდა უმაღლეს საბჭოში 15 ივნისს, თუმცა, ამ ჩანაწერის ჩასწორების საკითხი არ დასმულა.
აჭარის კანონმდებლებს ჩანაწერის ჩასწორებისთვის 4 ვარიანტი აქვთ:
- შეიძლება ჩაწერონ: 7 მილიონ 25 ათას 800 ლარი
- ან: 7 025 800 ლარი
- ან ასე: 7,025.8 ათასი ლარი
- ან კიდევ: 7 025.8 ათასი ლარი
აჭარის უმაღლესი საბჭოს იურისტის განმარტებით, „არის ტექნიკური ხარვეზი. გამორჩენილია მძიმის ნიშანი. მაგრამ ვინაიდან ეს მაინც არის პროექტი, რომელიც აჭარის მომავალი წლის ბიუჯეტში უნდა იქნას გათვალისწინებული, ბიუჯეტის დამტკიცების დროს [რომელსაც საბჭო ამტკიცებს] ეს ხარვეზიც გასწორდება. თუმცა, რაც არის ახლა დადგენილებაში ჩაწერილი, ის მილიარდად მაინც არ იკითხება“.
„აღნიშნული დადგენილებით განსაზღვრული თანხები გათვალისწინებული იქნეს „აჭარის ავტონომიური რესპუბლიკის 2024 წლის რესპუბლიკური ბიუჯეტის შესახებ“ აჭარის ავტონომიური რესპუბლიკის კანონის პროექტში“, – აღნიშნულია უმაღლესი საბჭოს დადგენილებაში.
ამ დადგენილებით, 2024 წელს, ისევე როგორც მიმდინარე წელს, „უმაღლესი საბჭოს მომუშავეთა რიცხოვნება განისაზღვრა 117 საშტატო ერთეულით“ ანაზღაურება კი 4 მილიონ 241 ათას 900 ლარით.
- 2022 წელს უმაღლესი საბჭოს ბიუჯეტი 5 809 500 ლარით იყო განსაზღვრული, საიდანაც ხელფასებში 3 880 800 ლარი დაიხარჯა
- 2023 წელს, უმაღლესი საბჭოს ბიუჯეტი განსაზღვრულია 7 125 900 ლარით, ხოლო აქედან ხელფასებისთვის 4 242 000 ლარია გათვალისწინებული.
________________________________
მთავარი ფოტო: დადგენილების პროექტის კენჭისყრა/სქრინი უმაღლესი საბჭოს 2023 წლის 12 ივნისის ვიდეომასალიდან.
