„ვფიქრობთ, რომ 2025 წლის ბოლოს ორივე ობიექტი უნდა იყოს დასრულებული იმ გარემოების გათვალისწინებით, რომ პროექტები განახლდა და მალე მოხდება შესაბამისი შესყიდვის გამოცხადება,“ – განაცხადა დღეს, 15 ივნისს აჭარის მთავრობის თავმჯდომარემ, თორნიკე რიჟვაძემ აჭარის უმაღლეს საბჭოში, სადაც მას ენმ-ს დეპუტატმა გიორგი კირთაძემ შეკითხვა დაუსვა ყინულის მოედნის და საცურაო აუზის მშენებლობაზე.
საუბარია სპორტულ კომპლექსზე, რომლის მშენებლობაც აჭარის მთავრობამ 2018 წელს დაიწყო და 2019 წლისთვის უნდა დაესრულებინა. კომპლექსის მშენებლობისთვის 29 მილიონი ლარი უკვე დაიხარჯა, თუმცა ადგილზე არც აუზი დაგხვდებათ და არც მოედანი.
კომპანიას, რომელიც კომპლექსს აშენებდა, ხელშეკრულება 2020 წელს შეუწყვიტეს. მშენებლობა ამ დრომდე არ განახლებულა.
თორნიკე რიჟვაძეს დღევანდელ სხდომაზე არ უთქვამს, ამ დრომდე რამ შეუშალა ხელი ახალ შესყიდვას.
„საცურაო აუზი და ყინულის სასახლე – საზოგადოებისთვის მინდა განვმარტო და მათ შორის პატივცემულო დეპუტატებო, თქვენთვისაც, რომ პირველ ეტაპზე, როცა კონტრაქტორის მხრიდან მიმდინარეობდა იქ სამუშაოების განხორციელება, პირდაპირ ვთქვათ, რომ კონტრაქტორმა ვერ შეძლო ჯეროვნად შეესრულებინა თავისი სახელშეკრულებო ვალდებულებები, შექმნა ნაწილი იმ სამუშაოების, რაც იყო დაკვეთილი და შესაბამისად, საბოლოო შეთანხმებით ანაზღაურდა ის ნაწილი, რამდენი სამუშაოც შეიქმნა.
შემდგომ მისი გაგრძელების პერსპექტივა არ იყო, ამიტომ მოგვიწევს, რომ ჩვენ ეს საქმე მივიყვანოთ ბოლომდე. მოქმედი საბაზრო განფასებებით მოხდება ამ პროექტების დასრულება,“ – განაცხადა თორნიკე რიჟვაძემ.
თორნიკე რიჟვაძე აჭარის უმაღლეს საბჭოში
2022 წლის 29 ნოემბერს თორნიკე რიჟვაძე ამბობდა, რომ ამ სპორტული კომპლექსის მშენებლობა 2 წელში, ანუ 2024 წელს დასრულდებოდა: ჩვენ განვაახლებთ ყინულის არენის და საცურაო აუზის მშენებლობას. შემდეგი ორი წლის განმავლობაში სრულად დასრულდება ეს პროექტი,“ – აცხადებდა მაშინ თორნიკე რიჟვაძე.
