ხულოს რაიონის სოფელი ირემაძეების საშუალო სკოლა 2008 წლის აგვისტოს ომში დაღუპული მერაბ ჭელიძის სახელს ატარებს. სკოლაში 70-მდე მოსწავლეა. სკოლის დირექტორი, მასწავლებელი და ოჯახის ახლობელი იხსენებენ მერაბს, ჰყვებიან მასზე ამბებს. იხსენებენ ომის დღეებს, მძიმე დღეებს, როცა სოფელსა და გარესამყაროს შორის გაწყვეტილი იყო კავშირი.
მერაბ ჭელიძის სახელობის სკოლის ქართული ენისა და ლიტერატურის მასწავლებელი შორენა გობაძე იხსენებს მერაბს და ამბობს, რომ ის იყო გამორჩეული ხასიათის ადამიანი, მუდამ მზად იყო, გვერდით დადგომოდა ყველას.
„იმიტომ დავარქვით ჩვენ სკოლას მერაბ ჭელიძის სახელი, რომ საამაყოა ეს ჩვენი სოფლისთვის. გმირი გაიზარდა ამ პატარა სოფელში, ამ ციცქნა სოფელში გაიზარდა გმირი. სახელი რჩებაო, ხომ ვიტყვით და მართლაც რომ სახელი დატოვა“, – ამბობს შორენა გობაძე.
შორენა გობაძე
მერაბმა სკოლა დაამთავრა სოფელ ირემაძეებში, შემდეგ ოჯახი წალკაში გადავიდა საცხოვრებლად. როგორც სკოლის დირექტორი, ბადრი ირემაძე იხსენებს, მას აკადემიურ მოსწრებასთან ერთად კარგი სპორტული მონაცემებიც ჰქონდა:
„მერაბი მაგალითი არის თითოეული ბავშვის, ვინც შემოდის სკოლაში და ვინც კითხულობს აბრაზე – მერაბ ჭელიძის სახელობის ირემაძეების საჯარო სკოლა. ეს ძალიან დიდი მოტივაციაა. 1982-1993 წლებში სწავლობდა მერაბი ჩვენ სკოლაში, სადაც მიიღო მან საშუალო განათლება. ამის შემდეგ ოჯახი გადავიდა წალკაში საცხოვრებლად. 1999 წელს მერაბი ჩაირიცხა თბილისის სახელმწიფო სამედიცინო უნივერსიტეტში.
„უნივერსიტეტის დამთავრების შემდეგ მუშაობა დაიწყო ბათუმის მეხუთე სამხედრო ბატალიონში სამხედრო ექიმის თანამდებობაზე. სულ რაღაც სამი თვის შემდგომ დაიწყო ის ავადსახსენებლი ომი რუსეთ-საქართველოს შორის.
მისი მეგობრები ყოველთვის ამბობდნენ, რომ მერაბი არ მიჰყავდათ, რადგან გამოუცდელი იყო სამხედრო საქმეში. მაგრამ როდესაც წავიდა სამედიცინო შემადგენლობა – ქალები, ახალგაზრდები, მანაც მიმართა უფროსობას, გაჰყოლოდა ბრძოლის ველზე დაჭრილების დასახმარებლად.
პირველივე დღეს, ცხინვალთან ახლოს, დაჭრილების გამოყვანისას, ნაღმის ნამსხვრევის მოხვედრის შედეგად დაიღუპა. გარდაცვალების შემდგომ მას მიენიჭა ვახტანგ გორგასლის მეორე ხარისხის ორდენი.
ომის პერიოდში ჩვენი სოფლიდან მერაბის გარდა კიდევ 14 ჯარისკაცი მსახურობდა არმიაში კონტრაქტით. ყოველდღე ველოდით ახალ ინფორმაციას. ომის პერიოდში, იმ 5 დღის განმავლობაში შეწყდა კავშირი აი, ამ ბავშვებთან. დაძაბული იყო მთელი სოფელი, ყველა დაძაბული ვიყავით.
როდესაც ჩამოასვენეს მერაბი… მისი გასვენების დღეს უკვე დასრულებული იყო ომი. ვერტმფრენები ფრენდნენ ძალიან დაბლა, ჩვენ რუსების ვერტმფრენები გვეგონა, მერე გავიგეთ, რომ ეს ქართული ვერტმფრენები ყოფილა”.
ბადრი ირემაძე
„ძალიან დიდი ტრაგედია იყო ჩვენთვის, მაგრამ იმ ბიჭებმა, მერაბის მეგობრებმა თავი შესწირეს ჩვენ მომავალს. მერაბთან ერთად მისი ბიძაშვილი იბრძოდა და პირველი ინფორმაცია მან მოგვაწოდა მერაბის დაღუპვის შესახებ – „მე ვერ გამოვდივარ ფრონტიდან და გორის სამხედრო ჰოსპიტალშია გადასვენებულიო“.
აქედან ჩავიდნენ ახლობლები, მეზობლები, თანასოფლელები და გარკვეული პროცედურების გავლის შემდგომ ჩამოასვენეს. მთელი სოფელი კი არა მთელი რაიონი იყო შეკრებილი და ელოდებოდა, რომ ღირსეულად გაეცილებინათ გმირი მერაბი ამ ქვეყნიდან.
ქვეყნის უსაფრთხოება პირდაპირ უკავშირდება ნატოში გაწევრიანებას. საქართველო აუცილებლად უნდა გახდეს ნატოს წევრი, საქართველო აუცილებლად უნდა გახდეს ევროკავშირის წევრი. აი, ეს ორი ინსტიტუტი არის გარანტი საქართველოს დამოუკიდებლობისა და უსაფრთხოების. ამ ყველაფერს პასუხი თავად ქართველმა ხალხმაც გასცა, როდესაც გადაწყვიტა, რომ საქართველო უნდა იყოს ნატოსა და ევროკავშირის წევრი. ალტერნატივა არ აქვს“, – ამბობს სკოლის დირექტორი, ბადრი ირემაძე.
_____
