ქობულეთის დაცულ ტერიტორიაზე, ისპანის ტორფნარზე, ფრინველებზე დაკვირვების სათვალთვალო კოშკის მშენებლობა იგეგმება. მომსახურების შესყიდვაზე ტენდერი აჭარის ტურისტული პროდუქტების განვითარების სააგენტომ გამოაცხადა 932 ათას 940 ლარით.
სააგენტოს ინფორმაციით, 2021 წელს მომზადდა პროექტი, რომელიც ქობულეთის დაცულ ტერიტორიაზე ითვალისწინებს გარემოსთან ადაპტირებული საფეხმავლო ბილიკების, გადმოსახედი კოშკურის, მოსასვენებელი კოტეჯის, ავტოპარკინგისა და ვიზიტორთა ცენტრის მოწყობას.
„შემუშავებული სრული პროექტიდან სააგენტო გეგმავს მხოლოდ გადამფრენი ფრინველების სათვალთვალო კოშკის მშენებლობას. სრული პროექტი გამარჯვებულს გადაეცემა ხელშეკრულების გაფორმების შემდეგ“, – აღნიშნულია ტენდერში.
პროექტის მიხედვით, „ნაგებობის მზიდი კონსტრუქცია დაპროექტებულია კომბინირებულად, კერძოდ კოშკის საძირკველი დაპროექტებულია რკინაბეტონით, ხოლო კოშკის მიწისზედა ნაწილი გადაწყვეტილია ლითონის კონსტრუქციებში.“
ტენდერში წინადადებების მიღება 2023 წლის 18 ივნისს დაიწყება და 23 ივნისს დასრულდება. ტენდერში გამარჯვებულმა კი კოშკის მშენებლობა ხელშეკრულების გაფორმების დღიდან 2024 წლის 20 ნოემბრამდე უნდა დაასრულოს.
სპეციალისტების თქმით, შავი ზღვის სანაპირო „აღმოსავლეთ შავი ზღვის სამიგრაციო დერეფნის“ სახელითაა ცნობილი, სადაც ყოველწლიურად 1 მილიონზე მეტი გადამფრენი მტაცებელი ფრინველი აღირიცხება. აჭარაში ყოველწლიურად იმართება გადამფრენ ფრინველებზე დაკვირვების საერთაშორისო ფესტივალი.
„ქობულეთის დაცული ტერიტორია, ისპანის ტორფნარი, სახელმწიფო ნაკრძალია, რომელიც ამავდროულად საერთაშორისო მნიშვნელობისაა და წარმოადგენს მსოფლიოს უმნიშვნელოვანეს ტორფნარს ბიომრავალფეროვნების კუთხით.
ისპანის ტორფნარები ზღვის სანაპიროდან სულ რაღაც 500 მეტრში მდებარეობს. რაც ძალიან მნიშვნელოვანია როგორც ტურისტების მოზიდვისათვის, ასევე მომიჯნავე ტერიტორიების მოსახლეობის სოციალური და ეკონომიკური მდგომარეობის გაუმჯობესების მიზნით.“ – აღნიშნულია სატენდერო განაცხადში.
ტურისტული პროდუქტების განვითარების სააგენტოს ინფორმაციით, „ქობულეთის დაცული ტერიტორია, რომლის ფართობის 770 ჰექტარია, ორ მთავარ ზონას მოიცავს: ისპანი 2 – სფაგნუმიან ტორფნარს, ანუ სახელმწიფო ნაკრძალს და ისპანი 1 ტორფნარი – აღკვეთილი.
სწორედ ისპანი 2 ნაკრძალი წარმოადგენს იუნესკოს ბუნებრივი მემკვიდრეობის სტატუსის მქონე ლოკაციას, ხოლო ისპანი 1 ბუფერულ ზონად განიხილება, სადაც შესაძლებელია ვიზიტორების მოზიდვა და ინფრატრუქტურული განვითარება, რომლის ფართობის დაახლოებით 1 ჰექტარია. ბუფერულ ზონად განიხილება ასევე ისპანი 2 ტორფნარის განაპირა ტყის ვიწრო ზოლი.“
მტირალას ეროვნულ პარკს, კოლხეთის ეროვნულ პარკს, ასევე კინტრიშისა და ქობულეთის დაცულ ტერიტორიებს, 2021 წელს UNESCO-ს მსოფლიო ბუნებრივი მემკვიდრეობის სტატუსი მიენიჭა.
ამავე თემაზე:
მსგავსი ტყეები და ტორფნარები მსოფლიოში არ არის – UNESCO-ს მსოფლიო მემკვიდრების სტატუსი
