„თხილის წარმოების ხელშეწყობის პროგრამაში“ შესული ახალი ცვლილებით, სუბსიდირებისთვის საჭირო თანხა 2,5 მილიონი ლარით გაიზარდა.
აღნიშნული პროგრამა 21 470 000 ლარის ნაცვლად, ჯამში 23 980 000 ლარით დაფინანსდება.
სოფლის განვითარების სააგენტოში „ბათუმელებს“ უთხრეს, რომ დაფინანსების გაზრდა მას შემდეგ მოითხოვეს, რაც თხილის ფართობები და შესაბამისად პროგრამით მოსარგებლე ბენეფიციართა რაოდენობა დაზუსტდა.
„მეთხილე ფერმერები [0,2-დან 3 ჰექტრის ჩათვლით თხილის ბაღით] სახელმწიფოსგან ჰექტარზე 500-ლარიან დახმარებას იღებენ. ახალი პროგრამით 85 ათასზე მეტი ფერმერი ისარგებლებს.
სუბსიდირებით მავნებლებისა და დაავადებების საწინააღმდეგო ღონისძიებები მთლიანობაში 44 000 ჰექტრამდე თხილის ბაღებში განხორციელდება. უკვე შექმნილია თხილის ბაღების კადასტრი/მონაცემთა ბაზა.
პროგრამის ფარგლებში ფერმერებმა 13,5 მილიონი ლარის ღირებულების პროდუქცია უკვე შეიძინეს“, – მოგვწერეს სააგენტოდან დღეს, 2023 წლის, 2 ივნისს.
ფერმერს თხილის სუბსიდიის თანხა ბარათზე ერიცხება [1 ქულა = 1 ლარი]. ბარათზე დარიცხული ქულების გამოყენების ბოლო ვადა კი, 2023 წლის 31 აგვისტოა.
თხილის წარმოების ხელშეწყობის პროგრამა მთავრობამ 2022 წლის ნოემბერში დაამტკიცა.
ამავე თემაზე:
„როდის მივიღებთ თხილის სუბსიდიას?“ – რა განმარტეს სოფლის განვითარების სააგენტოში
