„21 წლის ვარ, აქამდე არსად ვყოფილვარ დასაქმებული. ევროკავშირის პროექტის ფარგლებში, გასული წლის პირველი ივლისიდან ბათუმის დამოუკიდებელი ცხოვრების ცენტრში ანაზღაურებადი სტაჟირება დავიწყე“ – ამბობს დიანა აბულაძე.
დიანა, სხვა ახალგაზრდებთან ერთად, „ცოდნისა და უნარების განვითარების ქსელებისა და პლატფორმების გაძლიერების (LINKS) პროექტშია ჩართული, რომლის ერთ-ერთი მიზანია 15-დან 29 წლის ახალგაზრდებს პირველი ანაზღაურებადი დასაქმების შესაძლებლობა მისცეს.
18 მაისს პროექტის მონაწილე 5 წარმატებული სტაჟიორი ბათუმში ქრომბუქებით დააჯილდოვეს.
„ამ პროექტის ფარგლებში გავიარე ინგლისური ენის, ასევე კომპიუტერის და მეწარმეობის კურსები, რაც ძალიან დამეხმარა წინსვლაში. დღეს ლეპტოპითაც დამასაჩუქრეს, რაც ჩემს საქმიანობას გააადვილებს,“ – აღნიშნავს დიანა აბულაძე.
დიანა აბულაძე
LINKS-ის პროექტში ჩართვამდე დასაქმებული არც ლეილა ვანაძე ყოფილა. პროექტის ფარგლებში გავლილი ტრენინგების შემდეგ მან სტაჟირება ხულოს საჯარო ბიბლიოთეკაში დაიწყო, სოციალური მედიის სპეციალისტად:
„29 წლის ვარ და აქამდე არსად ვმუშაობდი. ჩემი სტაჟირება ჯერ არ დასრულებულა, თუმცა იმდენი ცოდნა და გამოცდილება მივიღე, რომ დიდი ალბათობით იგივე პოზიციაზე გავაგრძელებ მუშაობას.
დღეს ქრომბუქებიც გადმოგვცეს. ეს ჩემთვის ძალიან დიდი მხარდაჭერაა, რადგან სახლში არ მაქვს კომპიუტერი. ყოველთვის სამსახურის კომპიუტერზე ვიყავი დამოკიდებული. ეროვნულ გამოცდებს ვაბარებ და ძალიან დამეხმარება როგორც სწავლაში, ისე სამსახურში“, – ამბობს ლეილა ვანაძე.
ლეილა ვანაძე
ღია საზოგადოების ფონდის კოორდინატორის, ნინო კიკნაველიძის თქმით, პროექტის მონაწილე ახალგაზრდებს არ შეეძლოთ ლეპტოპების ყიდვა, რაც მათ დასაქმებისა და განათლებისთვის ძალიან სჭირდებათ. შესაბამისად, ფონდმა გადაწყვიტა თითოეულ რეგიონში მცხოვრები მონაწილეებისთვის 5-5 ქრომბუქი გამოეყო.
„ჩამოვედით აჭარაში, რათა სერთიფიკატებით დავაჯილდოვოთ ის ახალგაზრდები, რომლებმაც ინგლისური ენის კურსი გაიარეს. ასევე, გვინდა გავესაუბროთ ანაზღაურებადი სტაჟირების მონაწილეებსა და მათ დამსაქმებლებს. ჩვენ ადგილზე ვნახეთ როგორ მუშაობენ ისინი“ – ამბობს ნინო კიკნაველიძე.
ნინო კიკნაველიძე
ევროკავშირის პროექტის ერთ-ერთი პარტნიორი ორგანიზაცია ბათუმის დამოუკიდებელი ცხოვრების ცენტრია. რამინ მაჭარაშვილი თქმით, მსგავსი პროექტები მათ ორგანიზაციას ახალი კადრებითა და იდეებით აძლიერებს:
„დიანა აბულაძემ ჩვენს ორგანიზაციაში გაიარა სტაჟირება და ჩართული იყო ჩვენს ყოველდღიურ საქმიანობაში.
ძალიან საინტერესო და კარგი პროექტი იყო, რადგან მსგავსი პროექტები ახალი კადრების მოძიებაში გვეხმარება. მსგავს პროექტებში ყოველთვის სიამოვნებით ვერთვებით. სტაჟიორი ცოდნასა და გამოცდილებას იღებს და ჩვენც ახალ მოკავშირეებს ვიძენთ, რომლებსაც შშმ პირების უფლებებსა და საჭიროებებზე ცნობიერების გაზრდაში ვეხმარებით“, – აღნიშნავს რამინ მაჭარაშვილი.
რამინ მაჭარაშვილი
საქართველოს გაეროს ასოციაცია და საქართველოს ღია საზოგადოების ფონდი ევროკავშირის მხარდაჭერით ახორციელებენ „ცოდნისა და უნარების განვითარების ქსელებისა და პლატფორმების გაძლიერების (LINKS) პროექტს“.
პროექტი LINKS არის ევროკავშირის მასშტაბური პროგრამის – Skills4Jobs-ის ნაწილი და იგი ხორციელდება საქართველოს ოთხ რეგიონში: აჭარაში, გურიაში, შიდა ქართლსა და ქვემო ქართლში. აჭარაში პროექტის პარტნიორ ორგანიზაციას „თავისუფალ ჟურნალისტთა სახლი“ წარმოადგენს.
აჭარის რეგიონის მასშტაბით, LINKS პროექტის საქმიანობის შედეგად, 500-ზე მეტმა 15-დან 29 წლის ახალგაზრდამ განივითარა დასაქმებისათვის საკვანძო უნარები. 200-ზე მეტმა პროექტის მონაწილემ გაიარა პროფესიული და კარიერული კონსულტაცია. ჯამში დასაქმების პროგრამაში მონაწილეობის შესაძლებლობა 17 ახალგაზრდას მიეცა. აღსანიშნავია, რომ, „თავისუფალ ჟურნალისტთა სახლი“ სისტემატურად აწარმოებს მოლაპარაკებებს სხვადასხვა ორგანიზაციასთან ახალგაზრდების გრძელვადიანი დასაქმებისთვის.
„ცოდნისა და უნარების განვითარების ქსელებისა და პლატფორმების“ (LINKS) პროექტი ხორციელდება ევროკავშირის დაფინანსებით, „საქართველოს გაეროს ასოციაციისა“ (UNAG) და „საქართველოს ღია საზოგადოების ფონდის“ (OSGF) მიერ, ხოლო აჭარის რეგიონში პროექტის პარტნიორი ორგანიზაცია „თავისუფალ ჟურნალისტთა სახლია“ (IJH)
