დაბა ქედაში მრავალბინიანი სოციალური სახლის მშენებლობა იგეგმება. მშენებლობაზე ტენდერი მუნიციპალიტეტმა 7 მილიონ 80 ათასი ლარით გამოაცხადა. სოციალური სახლი ქედაში, თამარ მეფის ქუჩა N9-ში უნდა აშენდეს.
ტენდერში გამარჯვებული ვალდებული იქნება მითითებულ მისამართზე დააპროექტოს შენობა, შეადგინოს შესაბამისი ხარჯთაღრიცხვა, რომლის საფუძველზეც დაიწყებს მშენებლობას. ამ ყველაფრისთვის კი, ტენდერში გამარჯვებულს ხელშეკრულების გაფორმებიდან 24 თვე [2 წელი ექნება].
სამუშაოები ტერიტორიის შესწავლას, ასევე იქ არსებული შენობების დემონტაჟსაც ითვალისწინებს. სხვა მოთხოვნებთან ერთად „მიმწოდებელმა უნდა გაითვალისწინოს საპროექტო ტერიტორიის სპეციფიკაციები და შესაბამისად დაგეგმოს ტერიტორიაზე მისასვლელი გზები და ავტოსადგომები“.
ტენდერში წინადადებების მიღება 2023 წლის 6 მაისს დაიწყება და 11 მაისს დასრულდება.
სოციალურ სახლში მინიმუმ 50 საცხოვრებელი ბინა უნდა იყოს. მათგან არანაკლებ 15 – ოროთახიანი, 20 – სამოთახიანი და 15 – ოთხოთახიანი ბინა.
„ბათუმელები“ დაუკავშირდა ქედის მერიას, თუ რა კატეგორიის ოჯახებისთვის შენდება სოციალური სახლი, ზოგადად, რამდენი ოჯახის დაბინავების საჭიროება დგას და საიდან გამოიყო თანხა მშენებლობისთვის.
„ამ ეტაპზე არ არის განსაზღვრული რა კატეგორიის მოქალაქეები დაკმაყოფილდება ბინებით. სამშენებლო სამუშაოების დასრულების შემდეგ შეიქმნება შესაბამისი კომისია, რომელიც განცხადებების და გეოლოგიური დასკვნების საფუძველზე შეარჩევს ოჯახებს“ – მოგვწერეს ქედის მერიის პრესსამსახურიდან.
მერიაში ასევე გვითხრეს, რომ „სოციალური სახლის მშენებლობის პროექტი გარდამავალია და მიმდინარე წელს მხოლოდ 500 000 ლარის სამუშაოები უნდა განხორციელდეს“.
ტერიტორიის ფართობი, სადაც სოციალური სახლი უნდა აშენდეს 1 ჰექტარზე მეტია [11 370 კვ.მ].
დაბა ქედა / წითელი ფერით მონიშნულია ტერიტორია სადაც სოციალური სახლი უნდა ააშენონ
ქედაში სოციალური სახლის მშენებლობა აჭარის რესპუბლიკური ბიუჯეტიდან გამოყოფილი კაიტალური ტრანსფერით დაფინანსდება.
