გერმანიის ელჩმა საქართველოში, პეტერ ფიშერმა „ინტერპრესნიუსთან“ ინტერვიუში თქვა, რომ არ იცის, ვის გულისხმობენ „ოცნების“ ლიდერები, როცა „გლობალური ომის პარტიაზე“ საუბრობენ.
„ჩვენ გვესმის ასეთი სახის განცხადებები, ზოგჯერ რაღაც „გლობალურ ომის პარტიაზე“.
არ ვიცი, ვინ არის „გლობალური ომის პარტია“. ნაგულისხმევია გერმანია? ევროკავშირია ნაგულისხმევი?
მე ვკითხავდი იმ ადამიანებს, ვინც ასეთ განცხადებას აკეთებს. ეს ასე ვერ იქნება. ეს სისულელე იქნებოდა, რადგან ჩვენი მიზანი იყო ამ ომის თავიდან აცილება და როცა რუსეთის აგრესიის გამო ომი დაიწყო, ჩვენ ვცდილობდით მის შეზღუდვას და არა გაფართოებას.
ჩვენ ძალიან კარგად გვესმის საქართველოს სისუსტეები და შეზღუდვები და პატივს ვცემთ მათ. ყველას აქვს თავისი აზრის გამოთქმის უფლება. მაგრამ ზოგიერთი განცხადება ანტიდასავლურია და ეხება რაღაც გლობალურ ომის პარტიას და მეორე ფრონტს და იმას, რომ ვიღაც ცდილობს ამის მოწყობას. არ ვიცი, ვის გულისხმობენ. არა მგონია, ეს იყოს დასავლეთი“ – განაცხადა პეტერ ფიშერმა „ინტერპრესნიუსთან“.
მან ასევე აღნიშნა, რომ მუშაობენ საქართველოსთვის კანდიდატის სტატუსის მინიჭებაზე.
„კანდიდატის სტატუსი არის გზის დასაწყისი, რომელიც წევრობამდე მიდის. რატომ? იმიტომ, რომ ქართველების უმრავლესობას ეს სურს. მე ვიტყოდი, რომ ქართველი ხალხის გადასაწყვეტია ის, თუ რომელ ორბიტაზე იმყოფება საქართველო.
ჩვენ გვაქვს ინტერესი, გვაქვს უფრო მეტი შეთავაზება, მეტი, ვიდრე უბრალოდ „ჩვენს ორბიტაზე ყოფნაა“ – ჩვენ ვთავაზობთ საქართველოს გახდეს ჩვენი კავშირის წევრი და როცა ეს მოხდება, ქართველები იქნებიან ევროკავშირის მოქალაქეები ყველა იმ უფლებითა და ვალდებულებით, რაც ევროკავშირის მოქალაქეობას მოჰყვება,“ – განაცხადა ელჩმა.
