უკვე 2 წელია უზენაესი სასამართლო „ბათუმის ახალი მეჩეთის საქმეს“ არ იხილავს. უზენაესი სასამართლოს ადმინისტრაციაში ვერ გვითხრეს, რატომ დაარღვია უზენაესმა სასამართლომ ამ საქმეზე ვადა, ან როდის მიიღებენ საბოლოო გადაწყვეტილებას მუსლიმი თემის სარჩელზე?
მუსლიმი თემი ბათუმში ახალი მეჩეთის აშენებას 2017 წლიდან ცდილობს, თუმცა მათ ბათუმის მერია მშენებლობის ნებართვას არ აძლევს.
ბათუმის საქალაქო სასამართლოში მოსამართლე ჯუმბერ ბეჟანიძემ 2019 წლის სექტემბერში დაადგინა მუსლიმი თემის მიმართ დისკრიმინაცია, ქუთაისის სააპელაციო სასამართლომ კი, ბათუმის საქალაქო სასამართლოს გადაწყვეტილება ძალაში დატოვა. ეს გადაწყვეტილება სააპელაციო სასამართლომ 2 წლის წინ მიიღო – 2021 წლის 13 აპრილს.
მას შემდეგ კი პროცესი შეჩერებულია. მუსლიმი თემი ისევ ღია ცის ქვეშ ლოცულობს, ბათუმის მერიამ კი, უკანონო გადაწყვეტილების ნაცვლად ახალი გადაწყვეტილების მიღებას არჩია უზენაეს სასამართლოს დაელოდოს. ბათუმის მერიას უკვე ორი ინსტანციის სასამართლომ დაუდგინა დისკრიმინაცია მუსლიმი თემის მიმართ.
„ამ საქმის გაჭიანურებით, მუსლიმების ფუნდამენტური უფლებების დარღვევას განგრძობითი ხასიათი აქვს,“ – ამბობს მაკო ღავთაძე, TDI-ის წარმომადგენელი. ეს ორგანიზაცია და „სოციალური სამართლიანობის ცენტრი“ მუსლიმი თემის ინტერესებს იცავენ.
მაკო ღავთაძე განმარტავს, რომ უზენაესმა სასამართლომ საქმე დასაშვებად ცნო. ეს იმას ნიშნავს, რომ ის ამ საქმის განხილვას აპირებს. თუ საქმეს უზენაესი სასამართლო განსახილველად არ მიიღებდა, ქუთაისის სააპელაციო სასამართლოს მიერ მიღებული გადაწყვეტილება დარჩებოდა ძალაში და ის იქნებოდა საბოლოო.
უზენაესი სასამართლო ზეპირი მოსმენის, ანუ მხარეთა დასწრების გარეშე განიხილავს „ბათუმის ახალი მეჩეთის საქმეს“.
„ამ დრომდე ჩვენთვის უცნობია, როდის დაიწყება საქმის განხილვა, თუმცა განხილვისთვის დადგენილი ფორმალური ვადები უკვე ამოწურულია,“ – გვიყვება მაკო ღავთაძე, – „ფორმალური ვადა: საკასაციო საჩივრის შეტანიდან უნდა განიხილოს ჯამში 6 თვის ვადაში, აქედან პირველი სამი თვე არის დასაშვებობის შემოწმებისთვის.
მიგვაჩნია, ბათუმის მერია უზენაეს სასამართლოს იყენებს სწორედ იმ მიზნით, რომ საქმეზე საბოლოო გადაწყვეტილების მიღება გაჭიანურდეს და დრო მოიგონ, რადგან არ სურთ იმ გადაწყვეტილების აღსრულება, რაც სააპელაციო სასამართლომ მიიღო.
საქმის გაჭიანურების სტრატეგიას ირჩევს მერია დასაწყისიდანვე. რამდენადაც ვიცით, ზოგადად ბევრი საქმე ჭიანურდება სასამართლოში და ირღვევა ფორმალური ვადები, მაგრამ ამ შემთხვევაში გასათვალისწინებელია საქმის მნიშვნელობაც. ერთი მხრივ, მერიის გადაწყვეტილების უკანონო და დისკრიმინაციული შინაარსი ცალსახაა, რაც ორივე ინსტანციის სასამართლომაც დაადასტურა,“ – გვითხრა მაკო ღავთაძემ, TDI-ის წარმომადგენელმა.
ამ დროს, როცა უზენაესი სასამართლო მუსლიმი თემის საქმეს წლობით აჭიანურებს, პარლამენტში მუსლიმი თემის დამცველ დეპუტატს – ტარიელ ნაკაიძეს მიკროფონი ჩაარტყეს და აგენტი უწოდეს. კონფლიქტის მეორე დღეს, 23 მარტს, „ქართული ოცნების“ თავმჯდომარემ, ირაკლი კობახიძემ განაცხადა, რომ ტარიელ ნაკაიძეს მძიმე რეპუტაცია აქვს და კუთხეში დგომა ეკუთვნის.
———————–
ბათუმის მერიამ 2017 წლის 5 მაისს უთხრა უარი მუსლიმ თემს ქალაქში ახალი მეჩეთის მშენებლობის ნებართვის გაცემაზე. საუბარია, პირველი ეტაპის ნებართვის მიღებაზე. მერიამ მაშინ თავის გადაწყვეტილებაში აღნიშნა, რომ საცხოვრებელ ზონაში საკულტო ნაგებობის მშენებლობას ვერ დაუშვებდა. ბათუმის მერიის წინააღმდეგ სასამართლოში სარჩელი ააიპ „ბათუმში ახალი მეჩეთის მშენებლობის ფონდმა“ 2017 წლის 10 ივნისს შეიტანა.ამ საქმის განხილვა თვეობით ჭიანურდებოდა. მუსლიმი თემის ინტერესებს იცავენ: „სოციალური სამართლიანობის ცენტრი“, „ტოლერანტობის და მრავალფეროვნების ინსტიტუტი“.
მუსლიმი თემი სასამართლოში ითხოვდა ბათუმის მერიის მიერ მიღებული გადაწყვეტილების ბათილად ცნობას, დისკრიმინაციის დადგენას და მერიისთვის შესაბამისი სამართლებრივი აქტის გამოცემის დავალდებულებას. ბათუმის საქალაქო სასამართლომ არ დააკმაყოფილა მხოლოდ მერიისთვის შესაბამისი სამართლებრივი აქტის გამოცემის დავალდებულების მოთხოვნა.
ამ თემაზე:
„ოცნება“ მზადაა, გააღვივოს რელიგიური შუღლი – რეაქციები პარლამენტში მიკროფონის ჩარტყმაზე
