ბათუმის მერიას ავარიული სახლების ჩანაცვლების წესში ცვლილება შეაქვს. შესაბამისი განკარგულების პროექტი და მასთან დაკავშირებული დოკუმენტები მერიამ საკრებულოს უკვე გადაუგზავნა. ეს წესი ავარიული სახლების ჩანაცვლების პირობებსა და პროცედურას არეგულირებს.
მერიის განმარტებით, ავარიული სახლების პროგრამის ამოქმედების შემდეგ გამოიკვეთა რიგი გარემოებები, რომელთა გადაჭრასაც ავარიული სახლების ჩანაცვლების წესში ცვლილება სჭირდება.
შესაბამისი განკარგულების პროექტის განმარტებითი ბარათის მიხედვით, რთულია იმის გარკვევა, ზუსტად რას გულისხმობს და რა ცვლილებას გეგმავს მერია. ერთადერთი, რაც ირკვევა, არის ის, რომ მერიის შესაბამისმა სამსახურმა პროგრამის ფარგლებში ქირის ოდენობები დააზუსტა ქალაქის უბნების მიხედვით [ამ საკითხზე „ბათუმელები“ მუშაობს და დაზუსტებულ ინფორმაციას ხვალ, 28 მარტს, გამოვაქვეყნებთ].
წესის შესაბამისად, ავარიული სახლების ჩანაცვლება განიხილება, თუ შენობა ავარიულია და ავარიულობის ხარისხი მიეკუთვნება V, IV ან III კატეგორიას, შენობა-ნაგებობის ჩანაცვლებაზე არსებობს დაინტერესებული პირების თანხმობა, ხელმოწერის ნამდვილობა დადასტურებული უნდა იყოს სანოტარო წესით.
- რა მოხდება, თუ ავარიულ სახლში მცხოვრებს ფართობი დარეგისტრირებული არ აქვს?
ახალი წესის მიხედვით, რომელიც ჯერ დამტკიცებული არ არის, თუ საცხოვრებელი სახლის მესაკუთრეს საკუთრება დარეგისტრირებული არ აქვს, ასეთ შემთხვევაში საკითხის განხილვაში აჭარის მთავრობა ჩაერთვება.
მერია განმარტავს:
„ავარიული სახლების ჩანაცვლებისას, როდესაც საცხოვრებელი ფართის მოსარგებლეს ფართი არ აქვს საკუთრების უფლებით რეგისტრირებული და საცხოვრებელი ფართი წარმოადგენს მუნიციპალიტეტის, სახელმწიფოს ან აჭარის საკუთრებას, სანაცვლო საცხოვრებელი ფართები გაიცემა აჭარის მთავრობის ან სახელმწიფო ორგანოების ჩართულობითა და მათი გადაწყვეტილებით, მუნიციპალიტეტის საკრებულოს შესაბამისი მიმართვის საფუძველზე.“
- საკუთრების ჩანაცვლება – რას არ დაიანგარიშებს მერია
ახალი წესის მიხედვით, ავარიული სახლის ჩანაცვლებისას, დაინტერესებული პირების საკუთრებაში, გარდა ცალკეული შემთხვევებისა, არ დაიანგარიშებენ ბინათმესაკუთრეთა ამხანაგობის საერთო ქონებას: ავტოფარეხი, სარდაფი, სხვენის ფართობი, რომელიც არ გამოიყენება სამყოფად.
სხვენის, შენობის ბოლო სართულის გადახურვის ზემოთ, გარე კედლებსა და ქანობიანი ან ბრტყელი სახურავის ფერდების შიდა ზედაპირებს შორის განლაგებული სივრცეს იმ შემთხვევაშიც, თუ მისი საშუალო სიმაღლე იატაკიდან ჭერამდე 1.6 მეტრზე ნაკლებია.
არსებული ფაქტობრივი გარემოებიდან გამომდინარე, პროექტის განმახორციელებლის გადაწყვეტილებით, დაინტერესებული პირის საკუთრებაში შესაძლებელია ჩაითვალოს ამ მუხლის დაურეგისტრირებელი ფართობი ან მისი ნაწილი, თუ იგი კეთილმოწყობილია და ფაქტობრივად გამოიყენება საცხოვრებლად.
- ჩანაცვლება საბინაო ფონდის გამოყენებით
ავარიული სახლის ჩანაცვლებისას აშენებულ ახალ შენობაში ან მუნიციპალიტეტის საკუთრებაში არსებული საბინაო ფონდის გამოყენებისას, დაინტერესებულ პირს გადაეცემა არანაკლებ მის საკუთრებაში არსებული ფართობის ტოლი ფართობი გარემონტებულ მდგომარეობაში [როგორც რეგისტრირებული, ისე დაურეგისტრირებელი ან ფაქტობრივ სარგებლობაში არსებული ანაზომის მიხედვით].
ახალ შენობაში ან მუნიციპალიტეტის საკუთრებაში არსებული საბინაო ფონდის გამოყენებისას, დაინტერესებულ პირს, საბჭოს გადაწყვეტილების საფუძველზე, შესაძლებელია გადაეცეს გაზრდილი ფართობი არაუმეტეს 15 კვ.მ-სა.
ავარიული სახლის ჩანაცვლების ფარგლებში, დაინტერესებულ მხარესა და მერიას შორის ხელშეკრულების გაფორმებისა და მას შემდეგ რეგისტრირებულ მონაცემებში ცვლილების რეგისტრაციის, ასევე ვალდებულებებისა და უფლების რეგისტრაციის საფასურს ანაზღაურებს პროექტის განმახორციელებელი, ანუ მერია.
- ბინის ქირის კომპენსაცია
წესის მიხედვით, ავარიული სახლების ჩანაცვლების შესახებ დადებითი გადაწყვეტილების მიღების შემთხვევაში, დაინტერესებული პირები, საჭიროების შემთხვევაში, დადგენილი წესის შესაბამისად უზრუნველყოფილნი იქნებიან ბინის ქირის კომპენსაციით ახალი ბინის გადაცემამდე.
სხვა ტერიტორიაზე მუნიციპალიტეტის საკუთრებაში არსებული ფართობის გადაცემამდე [თუ მუნიციპალიტეტის საკუთრებაში არსებული ფართობი გაურემონტებელია, არასრულად გარემონტებულია ან რემონტი არ შეესაბამება ამ განკარგულებით განსაზღვრულ სარემონტო სამუშაოებს და დაინტერესებულ პირს მიეცემა რემონტის სანაცვლო ფულადი კომპენსაცია. ბინის ქირის კომპენსაცია გაიცემა:
- შავი კარკასის შემთხვევაში კომპენსაციის ჩარიცხვიდან ექვს თვემდე.
- არასრული რემონტის შემთხვევაში კომპენსაციის ჩარიცხვიდან ოთხ თვემდე.
- იმ შემთხვევაში, თუ რემონტი არ შეესაბამება ამ განკარგულებით განსაზღვრულ სარემონტო სამუშაოებს კომპენსაციის ჩარიცხვიდან ორ თვემდე. ამ შემთხვევაში ბინის ქირის კომპენსაციის თანხა გაიცემა წინასწარ სრული ოდენობით.
დაინტერესებული პირის სასარგებლოდ ყოველთვიური კომპენსაციის სახით ფულადი თანხა გაიცემა, თუ დაინტერესებული პირი საჯარო რეესტრში რეგისტრირებულ ან დაურეგისტრირებელ, ფაქტობრივ სარგებლობაში არსებულ ფართობს იყენებს საცხოვრებელი მიზნით. ქირის კომპენსაციის ოდენობა განისაზღვრება რეგისტრირებული ან ფაქტობრივი აზომვითი ნახაზით დადგენილი ფართობის ოდენობის შესაბამისად.