ბათუმის მერიის „იაფი სახლის“ პროგრამაში ბოლო დროს დამტკიცებულმა ცვლილებებმა პროგრამის სავარაუდო ბენეფიციარებში კითხვები გააჩინა.მოქალაქეების ნაწილს, რომლებიც ამ კითხვებით რედაქციაში მოგვმართეს აინტერესებდა ეხებათ თუ არა დამტკიცებული ცვლილებები მათ, ვინც განაცხადი გასული წლის დეკემბრამდე დაარეგისტრირა.
გარდა ამისა მოქალაქეებისთვის გაურკვეველი დარჩა დასრულდა თუ გრძელდება განაცხადების მიღება.
„მერია უსამართლოდ მოგვექცა“ – აცხადებენ მოქალაქეები, რომლებმაც განაცხადები იმ იმედით დაარეგისტრირეს, რომ კრიტერიუმებს აკმაყოფილებდნენ და იმედი ჰქონდათ, რომ მერია მათ განაცხადებს განიხილავდა, შემდეგ კი კრიტერიუმები შეცვალეს.
როგორც თავად გვიხსნიან, იმ შემთხვევაში თუ კრიტერიუმების შეცვლის გამო მერია მათ განაცხადებს განუხილველად დატოვებს ან შეცვლილი კრიტერიუმები შეეხებათ და მხოლოდ ამის გამო ეტყვიან მათ უარს „ეს უსამართლობა იქნება, რადგან განაცხადზე თანდართული დოკუმენტების შესაგროვებლად მათ მინიმუმ 200 ლარი დავხარჯეთ.“
მოქალაქე , რომელიც ამბობს, რომ შეცვლილ კრიტერიუმებს არ აკმაყოფილებს, აცხადებს, რომ განაცხადს არ შეიტანდა და და არც რესურსს დახარჯავდა მათ მოსამზადებლად.
15 თებერვალს ბათუმის მერიამ საკრებულოს თანხმობით „იაფი სახლის“ პროგრამაში, კონკრეტულად კი ბენეფიციარების შერჩევის კრიტერიუმებში, რამდენიმე საკითხი დააზუსტა.
გარდა ამისა, მერიამ, პროგრამის ფარგლებში, ჯავახიშვილის ქუჩაზე #82-ში აშენებული სახლების განაწილების დაწყებამდე, ამ სახლებში ერთი კვ.მეტრის ფასი და ყოველთვიური სახდელის ოდენობა განსაზღვრა [ბინის ღირებულება].
ცვლილებებზე პროგრამაში, რომელიც ბათუმის საკრებულომ უკვე დაამტკიცა წაიკითხეთ აქ.
ბათუმის მერიის ინფორმაციით, კრიტერიუმების დაზუსტება განაპირობა იმ გარემოებამ, რომ პროგრამაში მონაწილეობის სურვილს გამოთქვამდნენ ოჯახები, რომლებმაც ბათუმში რეგისტრაცია გაიარეს პროგრამის ამოქმედების შემდეგ, რეგისტრაციიდან ერთი წლის შემდგომ კი მიმართეს ბათუმის მერიას.
მერიამ ბათუმებთან ასევე დააზუსტა, რომ პროგრამით სარგებლობას შეძლებენ ბენეფიციარები, რომლებიც ბათუმში პროგრამის ამოქმედებამდე [ 2019 წლის თებერვლამდე[ დარეგისტრირდნენ.
მერიამ განმარტა, რომ განაცხადებს, რომლებიც მოქალაქეებმა პროგრამის მეორე ეტაპში მონაწილეობისათვის წარუდგინეს, შეცვლილი კრიტერიუმები შეეხება. საუბარი ეხება გასული წლის 31 დეკემბრამდე წარდგენილ განაცხადებს.
ამ ეტაპზე განაცხადების მიღება აღარ მიმდინარეობს, ეს პროცესი 31 დეკემბერს შეწყდა.
პროგრამის პირველ ეტაპზე მერიამ ბინა 80 ოჯახს გადასცა. პროგრამით სარგებლობა ბათუმში რეგისტრირებულ მოქალაქეებს შეუძლიათ, რომელთაც არ აქვთ ბინა და ბინის თვითღირებულების ქირის სახით დაფარვა შეუძლიათ. მერია შერჩეულ ოჯახებთან შესაბამის ხელშეკრულებებს აფორმებს.
