„მომხრე ვარ, რომ სააკაშვილს სასჯელი გადაუვადდეს და მოხდეს მისი საზღვარგარეთ გადაყვანა,“ – ამბობს თამაზ ბაკურიძე. ის მიხეილ სააკაშვილის პრეზიდენტობის დროს პატიმრობაში იყო. ყოფილი პატიმარი დღეს არასამთავრობო ორგანიზაციის „ჩვენი უფლებებისთვის“ ხელმძღვანელია და სოციალურად დაუცველი ჯგუფების ინტერესების დაცვაზე მუშაობს.
თბილისის საქალაქო სასამართლომ 6 თებერვალს არ დააკმაყოფილა შუამდგომლობა ჯანმრთელობის მდგომარეობის გაუარესების გამო მიხეილ სააკაშვილისთვის სასჯელის გადავადების ან სასჯელისგან გათავისუფლების შესახებ. დაცვის მხარე აპირებს სასჯელის გადავადების მოთხოვნით მიმართოს ევროპის ადამიანის უფლებათა დაცვის სასამართლოს.
თამაზ ბაკურიძის დაკვირვებით, მიხეილ სააკაშვილმა ხელისუფლებას საინფორმაციო ომი მოუგო, რადგან პატიმრის ჯანმრთელობის მდგომარეობის დაცვა პირდაპირ ხელისუფლების ვალდებულებაა. ყოფილი პატიმარი არ გამორიცხავს, რომ სააკაშვილის საქმეში შესაძლოა იყოს სიმულაცია, მაგრამ ის ყურადღებას ამახვილებს სააკაშვილის ვიზუალზე – როგორი იყო ექსპრეზიდენტი ციხეში შესვლამდე და როგორია ახლა.
„…ვიცით ყველამ, რომ სააკაშვილის რეჟიმის დროს იყო სისასტიკე, წამება, ბევრი ახალგაზრდა მოისპო, მაგრამ არის მეორე: დღეს მოქმედმა ხელისუფლებამ ის კი არ უნდა გააკეთოს, რომ რადგან შენ ამას აკეთებდი, მე შენ ამიტომ გსჯი. დღევანდელმა ხელისუფლებამ უფრო მეტი ჰუმანურობა უნდა გამოიჩინოს. ხელისუფლების ჰუმანურობა რაში გამოიხატება? – იმაში, თუ როგორ ექცევა იგი პატიმარს.
ჩვენ სახეზე გვყავს სააკაშვილი, რომელიც ძალიან დასუსტდა. ვიზუალურად ჩანს, რომ ის არის ძალიან მძიმე მდგომარეობაში. ჩვენ მოვისმინეთ საქართველოს ხელისუფლების პოზიცია, რომ სააკაშვილი არის მსახიობი. თუ ის მსახიობია და ქმნის სპექტაკლს, რომლის ავტორი, შემსრულებელი და დამდგმელი თვითონაა, მაშინ გამოდის, რომ მთელ ხელისუფლებას გჯობნის. რატომ ვერ ამტკიცებ, რომ ის არის მსახიობი? მსახიობობის გამოა, რომ დასუსტდა და ძირს ეცემა?“ – კითხულობს თამაზ ბაკურიძე.
ყოფილი პატიმარი ხაზს უსვამს კანონის მოთხოვნას, რომ ყველა პატიმრის უფლება უნდა იყოს თანაბრად დაცული.
„მაგრამ ყველა ხომ არ იყო ამ ქვეყნის პრეზიდენტი? სააკაშვილი იყო ამ სტატუსის მატარებელი და დღეს მთელი მსოფლიო გვიყურებს, როგორ ვექცევით ჩვენ ყოფილ პრეზიდენტს, თუ გინდ დამნაშავე იყოს. მაგალითად, შუა აზიაში პატიმრობაშია ყირგიზეთის პრეზიდენტი, რომლის სასჯელის გადავადებაზე ყირგიზეთის მთავრობამ გადაწყვეტილება მიიღო და მისცა მას საზღვარგარეთ გამგზავრების საშუალება. კადრებშიც ვნახეთ, რომ ყირგიზეთის პრეზიდენტი არ გამოიყურება ცუდად.
აქედან გამომდინარე, ჩვენ უფრო მეტი პასუხისმგებლობა გვმართებს. ჩვენ ხომ არ ვამბობთ, რომ სააკაშვილი უდანაშაულოა. ამას არავინ არ ამტკიცებს და თუ ვინმემ დანაშაული ჩაიდინა, მან ამაზე პასუხი უნდა აგოს, მაგრამ საუბარია სასჯელის გადავადებაზე მისი ჯანმრთელობის მდგომარეობის გამო,“ – აღნიშნა თამაზ ბაკურიძემ „ბათუმელებთან“.
თამაზ ბაკურიძის აზრით, ხელისუფლებას აშინებს, თავისი ამომრჩეველი არ გაუბრაზდეს, თუ სააკაშვილს სასჯელს გადაუვადებენ. თუმცა ყოფილი პატიმარი, რომელსაც ამ კატეგორიის ადამიანებთან მჭიდრო ურთიერთობა აქვს, ამჩნევს, რომ „ოცნების“ ამომრჩევლებშიც ბევრია სასჯელის გადავადების და ჰუმანური მოპყრობის მომხრე.
„მე, როგორც ადამიანს, ვისაც ურთიერთობა აქვს სხვადასხვა ადამიანთან, აზრი იყოფა ამგვარად: ზოგი ფიქრობს და ამბობს, რომ აი, მისი პრეზიდენტობის დროს ხომ ასეთი რამ ხდებოდა? ახლა თვითონ ნახოს, როგორია ციხეში ყოფნა. ზოგიც ამბობს, ეგ რა ციხეა, ოროთახიან საკანშია, მნახველების პრობლემა არა აქვს, ვისაც უნდა შედის, ოჯახს ნახულობს, ეს ხომ წამება არ არის?
არიან ისეთებიც, რომლებიც ამბობენ, რომ აი, რა დღეში ჩააგდეს ადამიანი, რომელმაც საქართველო გადაარჩინა და ააღორძინა. მოკლედ, აზრთა სხვადასხვაობაა.
არ ვიცი, რამდენად ობიექტური იქნება ჩემი არგუმენტები, ადამიანის, რომელიც სააკაშვილის პრეზიდენტობის დროს პატიმრობაში ვიყავი და ადამიანის, რომლის თვალწინაც გაიარა სისასტიკემ, კაცთმოძულეობამ, რაც მის დროს საპატიმრო ადგილებში შეიქმნა. აღარ ვამბობ ადამიანების წამებას, ტელევიზორიც კი, გაიტანეს საკნებიდან. მაშინ მე დავურეკე ქალბატონ ელენე თევდორაძეს, რომელიც ადამიანის უფლებათა დაცვის კომიტეტის ხელმძღვანელი იყო, იქნებ ტელევიზორი მაინც დაგვიტოვოთ საკანში, რაღაცას მაინც ვუყუროთ და ხალხს შესაძლებლობა ჰქონდეს, რომ დრო გაიყვანოს-მეთქი. მაშინ ამ ზარმა იმოქმედა და ბათუმის ციხიდან ტელევიზორები არ გაიტანეს…
კი, ბატონო, მის დროს სასჯელის გადავადება, როგორც ინსტიტუტი, საერთოდ გაუქმდა და კიბოს მე-4 სტადიით დაავადებულსაც არ უშვებდნენ ციხიდან, მაგრამ ჩვენ მხოლოდ წარსულით არ უნდა ვიცხოვროთ. ჩვენ მომავალზე უნდა ვიფიქროთ და უკეთესი პენიტენციური სისტემა უნდა შევქმნათ.
სახელმწიფო ისედაც ვალდებულია პატიმრის ჯანმრთელობაზე იზრუნოს, როგორც კი ციხის ზღვარს გადააბიჯებ. იმაზე, რომ პატიმარი არ ჭამს, ან სათანადოდ არ იკვებება, ან თავად იგდებს ამ მდგომარეობაში თავს, ყველა ვარიანტში სახელმწიფოა პასუხისმგებელი. მე რომ ხელისუფლების ადგილზე ვიყო, მივცემდი მას შესაძლებლობას, სასჯელი გადაუვადდეს და მთელი მსოფლიოც დაინახავს, რომ ეს ხელისუფლება უფრო ჰუმანურია, ვიდრე წინა. საზოგადოებაც დამშვიდდება.
ეს არის ქვეყნის პრესტიჟიც. არ არის აქ მთავარი, ის დამნაშავეა თუ არა, კრიმინალია თუ არა, მისი პრეზიდენტობის დროს რა ხდებოდა, საერთაშორისო საზოგადოება არ დაიწყებს ახლა და არც არავის სცალია, რომ რამდენი პატიმარი მოკვდა მის დროს, როგორ აწამებდნენ, ამას არავინ არ გამოჩხრეკს, საერთაშორისო საზოგადოება უყურებს და უჩვენებს მთელ მსოფლიოს, რომ ადამიანი, რომელიც ებრძოდა რუსეთს, ასე იცნობენ მას და მეორე მხარეა, როგორ ებრძოდა, პირიქით, ჩააბარა რუსეთს ტერიტორიები და ბევრი სტრატეგიული ობიექტიც, მაგრამ საერთაშორისო საზოგადოებაში ასე ჩანს.
ხელისუფლებას ეშინია, რომ არ აუჯანყდნენ თავისი მომხრეები, მაგრამ ისევ თავის მომხრეებშია უკვე ეს მოთხოვნა და იქმნება შთაბეჭდილება, რომ მას შეექმნება წამებულის სახე და ეს არ უნდა დაუშვან. ვიღაცამ უნდა იფიქროს ამაზე და გააანალიზოს, რომ უარესი არ მიიღოს,“ – უთხრა თამაზ ბაკურიძემ „ბათუმელებს“.
