დღეს, 6 თებერვალს, გამთენიისას თურქეთში 7.7 მაგნიტუდის სიმძლავრის მიწისძვრა მოხდა. მიწისძვრის ეპიცენტრი თურქეთის სამხრეთით მდებარე პროვინციაში, კაჰრამანმარაშში იყო. განმეორებით ბიძგებმა კი სამხრეთის სხვა პროვინციებამდეც მიაღწია.
პირველადი ინფორმაციით დაღუპულია 76 ადამიანი. თურქული გამოცემა „დეილი საბაჰი“ თურქეთის ოფიციალურ წყაროებზე დაყრდნობით წერს, რომ 23 ადამიანი დაიღუპა მალატიის პროვინციაში, 17 ადამიანი – შანლიურფაში, შვიდი – ოსმანიეში და ექვსი – დიარბაქირში. თუმცა იმის გამო, რომ ათობით შენობაა დანგრეული და სამაშველო ოპერაციები ამ დრომდე მიმდინარეობს, ვარაუდობენ, რომ მსხვერპლი გაცილებით დიდი იქნება.
თურქეთის კატასტროფებისა და საგანგებო სიტუაციების სამსახურის ცნობით, 7,7 მაგნიტუდის მიწისძვრა დილის 4:17 საათზე დაფიქსირდა პაზარჯიკის რაიონში.
მიწისძვრა 7 კილომეტრის სიღრმეზე მოხდა. მას მოჰყვა მეორე, 6,4 მაგნიტუდის მიწისძვრა, რომლის ეპიცენტრი სამხრეთ-აღმოსავლეთ გაზიანტეპის პროვინციაში იყო. მესამე მიწისძვრა, რომელიც 6,5 მაგნიტუდის სიმძლავრის იყო, გაზიანთეფში მოხდა.
პირველი მიწისძვრა ასევე იგრძნობოდა სამხრეთ-აღმოსავლეთის სხვა პროვინციებში, მათ შორის დიარბაქირში. ასევე თურქეთის მეზობელ ქვეყნებში, ლიბანსა და სირიაში.
