ქობულეთის საკრებულომ ეკლესიის მოთხოვნას კონკრეტული მიწის ნაკვეთის გადაცემაზე დადებითად უპასუხა. ეკლესიამ 99 წლის ვადით უსასყიდლოდ მიიღო მიწის ნაკვეთი ქობულეთში, კაიკაციშვილის ქუჩაზე.
როგორც დოკუმენტებით, ირკვევა გადაცემულ ნაკვეთზე ეკლესიის მშენებლობა იგეგმება.
ეკლესიისთვის გადაცემული ნაკვეთი 330 კვ. მეტრია და სახელმწიფოს საკუთრებაში არსებული მიწის ნაკვეთები ესაზღვრება.
ნაკვეთის მოთხოვნით ბათუმისა და ლაზეთის მიტროპოლიტმა დიმიტრიმ ქობულეთის მერს 2022 წლის მაისში მიმართა. მიტროპოლიტი მერიას სწერდა, რომ მოთხოვნილ ნაკვეთზე ეკლესიის მშენებლობას მოსახლეობა ითხოვს.
ნაკვეთის გადაცემასთან დაკავშირებით ქობულეთის მერი, ლევან ზოიძე, საკრებულოს თავმჯდომარეს დავით მჭედლიშვილს სწერს, რომ ქობულეთის მერიის მიზანშეწონილობის, განკარგვის ფორმებისა და პირობების განსაზღვრის კომისიამ საკითხი სხდომაზე განიხილა და მოთხოვნილი ნაკვეთის ეკლესიისთვის გადაცემა მიზანშეწონილად მიიჩნია:
„იმ მოტივიდან გამომდინარე, რომ დღითი დღე იზრდება მართლმადიდებლური ეკლესიის მრევლი და ეკლესიური ცხოვრება ბევრს სულიერ მოთხოვნილებად ექცა. ვინაიდან, მრევლი გამრავლდა და ქალაქში მოქმედი ეკლესიები ყველა მომლოცველს ვერ იტევს, მიზანშეწონილად მიიჩნიეს ქობულეთში, კაიკაციშვილის ქუჩაზე არსებული 330 კვ. მეტრი აღნაგობის უფლებით, 99 წლის ვადით გადაცემა“.
ეს გადაწყვეტილება კიდევ ერთხელ აჩვენებს სახელმწიფოს სტრუქტურების მხრიდან არაერთგვაროვან დამოკიდებულებას რელიგიური ინსტიტუტების მიმართ. სახელმწიფოს ერთი სტრუქტურა, კონკრეტულად ქობულეთის მერია, უსასყიდლოდ გადასცემს მართლმადიდებლურ ეკლესიას მიწის ნაკვეთს იმ მოტივით, რომ მრევლს სალოცავი სჭირდება და ეკლესიის მშენებლობას ითხოვს. მეორე სტრუქტურა კი, ამ შემთხვევაში ბათუმის მერია, იმავე მოტივს არ იზიარებს და მუსლიმებს მეჩეთის მშენებლობის უფლებას არ აძლევს მიწის ნაკვეთზე, რომელიც ამ თემის საკუთრებაა.
უკვე რამდენიმე წელია მუსლიმი მრევლი იმავე მოტივით ბათუმში მეჩეთის მშენებლობის ნებართვას ითხოვს, თუმცა ბათუმის მერიამ მშენებლობის ნებართვა არ გასცა, სასამართლოს გადაწყვეტილება კი, რითაც მუსლიმების მიმართ დისკრიმინაცია დადგინდა, მერიამ ჯერ სააპელაციო, შემდეგ კი უზენაეს სასამართლოში გაასაჩივრა.
ბათუმის საქალაქო სასამართლომ 2019 წლის 30 სექტემბერს დისკრიმინაციად მიიჩნია მუსლიმი თემის მიმართ ბათუმის მერიის დამოკიდებულება „ბათუმის ახალი მეჩეთის საქმეზე“. მოსამართლე ჯუმბერ ბეჟანიძემ უკანონოდ მიიჩნია ბათუმის მერიის გადაწყვეტილება, რომლითაც მუსლიმ თემს მეჩეთის აშენებაზე უარი უთხრეს.
ქუთაისის სააპელაციო სასამართლომ მოსამართლე ჯუმბერ ბეჟანიძის მიერ მიღებული გადაწყვეტილება 2021 წლის 13 აპრილს ძალაში დატოვა.
