სახის კანის სწორად მოვლა აუცილებელია მისი ჯანმრთელობის შესანარჩუნებლად. კლინიკა “როგოს” ექიმი-დერმატოლოგი, კოსმეტოლოგი მანანა ამაღლობელი ამბობს, რომ კანის მოვლის პირველი და ყველაზე მნიშვნელოვანი წესი მზის ულტრაიისფერი სხივებისგან დაცვაა, მეორე კი – სწორად შერჩეული საშუალებებით, ყოველდღიური რუტინის შემუშავება.
- ქალბატონო მანანა, რა ასაკიდან უნდა დაიწყოს კანის ინტენსიური მოვლა?
დავიწყოთ იქიდან, რომ ნებისმიერი ასაკის პაციენტმა უნდა მოუაროს არამარტო სახის, არამედ სხეულის კანს. პუბერტატული ასაკიდან პოსტპუბერტატულ ასაკამდე და მერეც, თუ გვინდა, რომ პირველ რიგში ჯანსაღი კანი გვქონდეს, თუმცა ცხადია, ფიზიოლოგიას მაინც ვერ გავექცევით.
მყავს 20 წლიდან პაციენტები, რომლებთანაც ვატარებთ საპრევენციო მკურნალობას, პრევენციულ ჩარევებს, ხოლო 25-30 წლის შემდეგ უკვე აქტიურად ხდება კანის მოვლა, რომელიც მოიცავს ყოველდღიურ და პრევენციულ მოვლას.
ყოველდღიური მოვლა გულისხმობს კანის ტიპის მიხედვით სწორად შერჩეული საშუალებების სახლში, ყოველდღიურ გამოყენებას – იქნება ეს დასაბანი საშუალება, ტონერი, მკვებავი თუ აღმდგენი კრემი.
პრევენციული მოვლა მოიცავს კლინიკაში ჩატარებულ, სეზონურ თუ არასეზონურ პროცედურებს. მაგალითად, ზამთარში ძალიან კარგია პილინგი, რომელიც შეირჩევა კანის პრობლემიდან გამომდინარე, პიგმენტური კანის მქონე პაციენტებს სხვა პილინგი სჭირდებათ, ცხიმიანი კანის მქონეს – სხვა, აკნეტოზურ კანს – სხვა, ანტიასაკობრივ კანს – კიდევ სხვა. ბევრი პრევენციული პროცედურა არსებობს საიმისოდ, რომ კანის სტრუქტურა შევინარჩუნოთ.
- რატომ იცვლება კანის სტრუქტურა?
35 წლის შემდეგ ელასტინი და კოლაგენი ისე ვეღარ სინთეზირდება, როგორც იქამდე. შესაბამისად, ვიღებთ ნაოჭებს და არათანაბარ კანის ტონს, იწყება ფტოზი [დაშვება, დაწევა], კანი მოდუნებულია და ა.შ. ეს უყურადღებობის შემთხვევაში მაქვს საუბარი.
- აისახება თუ არა კვება და ცხოვრების წესი სახის კანზე?
დიახ. ის, თუ რამდენად ჯანსაღად ვიკვებებით, როგორია ჩვენი ცხოვრების ყოველდღიური რიტმი, როგორია ჩვენი ფიზიკური აქტივობა და ცხადია, გენეტიკა – ეს ყველაფერი ჩანს ჩვენს კანზე.
მაგალითად, ჩემთან ძირითადად დერმატოლოგიური პრობლემის მქონე პაციენტები მოდიან, რომელთაც ვუზღუდავ ტკბილს და ცხიმიან საკვებს, რაც ყველაზე მეტად აღიზიანებს კუჭქვეშა ჯირკვალს, მოდის ორგანული სტრესი, ხდება ჰორმონების არათანაბარი გამომუშავება და ვიღებთ სახეზე აკნეს, პროცესის გამწვავებას.
- რა არის მთავარი რეკომენდაციები სახის კანის მოვლის დროს?
ყველაზე მნიშვნელოვანია კანის დაცვა მზის სხივებისგან. ადრე ასე აქტუალური არ იყო ეს საკითხი, მაგრამ დღეს კვლევებით დადასტურებულია, რომ მზის სხივები ყველაზე მეტად აზიანებს კანს.
მზისგან დამცავი უნდა გამოვიყენოთ სისტემატურად. შეძენისას დააკვირდით, შეფუთვაზე ეწეროს დაცვა როგორც UVB, ისე UVA სხივისგან – ანუ ულტრაიისფერი A და B სხივებისგან.
თუ დღის განმავლობაში მზეზე იმყოფება ადამიანი, ყოველ ორ საათში უნდა მოხდეს მზისგან დამცავის განახლება, ანუ ხელმეორედ დატანა კანზე.
ჯანმრთელი კანის შესანარჩუნებლად, დერმატიტის, პიგმენტური ლაქების, ნაადრევი ნაოჭების თავიდან ასაცილებლად, მზისგან დამცავი საცხი უნდა გამოიყენოს ყველამ – ქალმა, კაცმა, ბავშვმა, მოხუცმა, მოკლედ, ნებისმიერი ასაკისა და სქესის ადამიანმა.
მზისგან დამცავი საშუალებები არსებობს როგორც კრემის, ისე მუსის და სპრეის სახით, ვისაც რა ფორმით ურჩევნია მისი გამოყენება, ისე შეუძლია გამოიყენოს. მაგალითად, თუ ზაფხულში კრემის წასმა დისკომფორტია, გამოიყენეთ სპრეი, რომელიც უფრო თხელია და ადვილად დაიტანება კანზე.
გარდა ამისა, ძალიან მნიშვნელოვანია დავაწესოთ სახლის რუტინა სახის მოვლის სწორად შერჩეული საშუალებებით – კანის დასაბანი გელი (რადგან, კანის გასუფთავება არის ძალიან მნიშვნელოვანი ნაწილი), დაბანის შემდეგ გამოსაყენებელი ტონერი (რათა მოხდეს pH ბალანსის წონასწორობის აღდგენა), მკვებავი თუ აღმდგენი კრემი.
პრობლემიდან გამომდინარე, ჩვენ ასევე ვურჩევთ ანტიოქსიდანტურ, ანტიპიგმენტურ შრატებს, გააჩნია, პაციენტს რა პრობლემა აქვს.
- წყლის ნაკლებობა ვნებს კანს?
წყლის ადეკვატური რაოდენობით მიღება გვიცავს გაუწყლოებისგან და, ცხადია, სასარგებლოა როგორც კანისთვის, ისე მთლიანად ორგანიზმისთვის, რადგან უკეთესად ხდება წყლის ბალანსის შევსება, ლიმფოდრენაჟი კარგად მიდის, სხეულის დეტოქსიკაცია კარგად ხდება და წყლის სასარგებლო ზემოქმედება კანზეც აისახება, თუმცა კანის დატენიანებისთვის მხოლოდ წყლის დალევა არ არის საკმარისი.
თუ ჩვენება არის კანის გამოშრობა, აუცილებლად უნდა მიეწოდოს ხელოვნურად ჰიალურონი, ამინომჟავები, მინერალები და ვიტამინები, რომ წყლის სინთეზი გაძლიერდეს კანში.
- ეფექტურია თუ არა სახის მასაჟორები, რომლებიც დღეს მრავლადაა ბაზარზე წარმოდგენილი?
თუ იცის პაციენტმა სახის კუნთების სწორი განლაგება და იცის, რა მიმართულებით უნდა დაიმასაჟოს სახის კანი, სასარგებლოა, რადგან ხდება კუნთის სტიმულირება, ანუ კანზე ხშირი მოძრაობისას კანი ხურდება, სისხლის მიმოქცევა უმჯობესდება და შესაბამისად, ხდება ელასტინის სტიმულაცია.
- რამდენად ეფექტური და უსაფრთხოა სახეზე ხილის და სხვა საკვები პროდუქტების წასმა?
ეს არ არის უსაფრთხო. მე კატეგორიულად ვეწინააღმდეგები საკვები ინგრედიენტების სახეზე წასმას, მაგალითად, ავიღოთ ლიმონი, შეიძლება ისეთი დამწვრობა მიიღოს პაციენტმა და მქონია პრაქტიკაში ასეთი შემთხვევა, რომ მერე ესეც სამკურნალო დარჩეს.
