ომის შესწავლის ამერიკული ინსტიტუტი (ISW) ყოველდღიურ ანგარიშში წერს, რომ რუსეთმა უკვე მიიღო ან უახლოეს მომავალში ელოდება დრონების ახალ პარტიას ირანიდან.
ISW-ის ცნობით, რუსულმა ძალებმა, სავარაუდოდ, განაახლეს ირანული ტექნიკის გამოყენება უკრაინის ქალაქებზე თავდასხმისთვის სამი კვირის განმავლობაში პირველად – ISW-ის შეფასებით, 23 ოქტომბრის შემდეგ რუსეთის ძალებს არ გამოუყენებიათ ირანული დრონები უკრაინის ინფრასტრუქტურაზე თავდასხმისთვის.
სამხედრო ექსპერტები მიიჩნევენ, რომ რუსეთის უპილოტო საფრენი აპარატების თავდასხმების სიხშირის ზრდა შეიძლება მიუთითებდეს იმაზე, რომ რუსულმა ძალებმა სამკვირიან პერიოდში ტექნიკა მიიღეს ან ელოდებიან ირანიდან დრონების ახალ პარტიას.
ანგარიშში The Times-ის ანონიმურ წყაროზე დაყრდნობით აღნიშნულია, რომ სავარაუდოდ პენტაგონი აღარ სთხოვს უკრაინას, თავი შეიკავოს რუსეთში სამხედრო ობიექტებზე თავდასხმისგან, უკრაინის ინფრასტრუქტურის სისტემატური განადგურების ფონზე.
ასევე, ანგარიშში აღნიშნულია, რომ პუტინი დონეცკის ოლქში მარიონეტული ლიდერების მხარდაჭერის დაკარგვის რისკის ქვეშაა, რადგან რუსული ძალები ვერ ახერხებენ უკრაინული ძალების გაყვანას დონეცკის საარტილერიო ზოლიდან.
________________
ფოტოზე: ირანული დრონები
