„ვაგნერის“ მფლობელი ევროპარლამენტისთვის „სისხლიანი“ უროს გაგზავნას აპირებს. ასე ევგენი პრიგოჟინი პასუხობს ცნობას, რომ ევროპარლამენტმა „ვაგნერი“ შესაძლოა ტერორისტულ ორგანიზაციად აღიაროს.
22 ნოემბერს გამოცემა Politico-მ დაწერა, რომ ევროპარლამენტის დეპუტატებს „ვაგნერის“ ტერორისტულ ორგანიზაციად გამოცხადება სურთ. იმავე დღეს „ტელეგრამში“ ევგენი პრიგოჟინის კომენტარი და სამხედრო ბლოგერებისადმი მიმართვა გამოქვეყნდა.
„დღეს თათბირი მქონდა „ვაგნერის“ მეთაურებთან და ეს სამწუხარო ამბავიც ვაცნობე. არ ვიცი, რომელი კანონით ხელმძღვანელობს ევროპარლამენტი, მაგრამ ჩვენი კანონმდებლობით, ჩვენ ევროპარლამენტს დაშლილად ვაცხადებთ. თუმცა მანამდე, ვიდრე ეს პროცედურა კანონიერ ძალაში შევა, მე დამევალა ევროპარლამენტს საინფორმაციო ამანათი გადავცე. გთავაზობთ, ერთად გავაკეთოთ ეს – მოვამზადოთ და გავგზავნოთ,“ – დაწერა პრიგოჟინმა.
მოგვიანებით პრიგოჟინის იურისტმა „საინფორმაციო ამანათი“ მიიტანა ტელეგრამარხის КИБЕР ФРОНТА Z-ს ბლოგერებთან, რომლებიც საკუთარ თავს „რუსეთის საინფორმაციო ჯარებს“ უწოდებენ.
„ამანათი“ აღმოჩნდა ვიოლინოს ფუტლარი, რომელშიც ბუტაფორიული სისხლით დასვრილი ურო იდო.
სწორედ ასეთი უროთი მოკლეს „ვაგნერელებმა“ ყოფილი ტყვე ევგენი ნუჟინი, რომელიც თავის დროზე პრიგოჟინმა გამოიყვანა საპატიმროდან უკრაინაში გასაგზავნად.
ნუჟინი უკრაინაში ტყვედ ჩავარდა, ინტერვიუ მისცა უკრაინელ ჟურნალისტს, პუტინი გააკრიტიკა და უკრაინის შეიარაღებულ ძალებში ბრძოლის სურვილი გამოთქვა. მოგვიანებით, გაცვლის ფარგლებში, ევგენი ნუჟინი რუსეთში დაბრუნდა.
მისი მკვლელობის ვიდეო „ვაგნერთან“ დაკავშირებულ ტელეგრამარხებზე გავრცელდა და ახლდა მინაწერი – „მოღალატემ ჭეშმარიტად ვაგნერული სასჯელი მიიღო.“
ნუჟინის გაცვლასთან დაკავშირებით კომენტარი გააკეთა უკრაინის პრეზიდენტის მრჩეველმა მიხაილო პოდოლიაკმა, რომელმაც აღნიშნა, რომ გაცვლა თავად სამხედრო ტყვის სურვილით მოხდა.
მთავარ ფოტოზე: პრიგოჟინის იურისტმა ბლოგერებთან „საინფორმაციო ამანათი“ მიიტანა/სქრინი ვიდეოდან
