ომის კვლევის ამერიკული ინსტიტუტის (ISW) დასკვნით, რუსეთის პრეზიდენტს, ვლადიმერ პუტინს, უკრაინაში საკუთარი მიზნები არ შეუცვლია. ის ამ მიზნებს უბრალოდ ნიღბავს და აგრესიული და შედარებით გაწონასწორებული რიტორიკის დაბალანსებას ცდილობს, რაც რუს ნაციონალისტთა წრეებში უკმაყოფილებას იწვევს.
„კრემლს არ უთქვამს უარი თავის მაქსიმალურ მიზნებზე უკრაინაში, ის მხოლოდ ამ მიზნების გაბუნდოვანებას ცდილობს, რათა დასავლეთის ქვეყნები შეცდომაში შეიყვანოს და უკრაინას მოლაპარაკებების მაგიდასთან დაჯდომა აიძულოს,“ – წერენ ინსტიტუტის ექსპერტები.
ანალიტიკოსები პუტინისა და კრემლის ჩინოვნიკების ახლანდელ და ადრინდელ განცხადებებსაც იხსენებენ.
21 ნოემბერს პუტინის პრესსპიკერმა დმიტრი პესკოვმა თქვა, რომ უკრაინის ახლანდელი ხელისუფლების შეცვლა რუსეთის „სპეციალური სამხედრო ოპერაციის“ მიზანი არ არის და ამაზე მანამდე „პრეზიდენტმაც ილაპარაკა.“
26 და 27 ოქტომბრის გამოსვლებში ვლადიმერ პუტინი ერთმნიშვნელოვნად აცხადებდა, რომ „უკრაინამ თავისი სუვერენიტეტი დაკარგა და მთლიანად NATO-ს კონტროლქვეშ მოექცა“. პუტინი უკრაინის დამოუკიდებლობას უარყოფდა, ამბობდა, რომ უკრაინა რუსეთმა „შექმნა“ და „ერთადერთი რეალური გარანტია უკრაინის სუვერენიტეტისთვის“ მხოლოდ რუსეთი შეიძლება იყოს. პუტინი დიდი ხნის განმავლობაში იმეორებდა თეზისსაც, რომ უკრაინა ნაცისტური სახელმწიფოა და საჭიროა მისი „დენაციფიცირება“.
„პუტინის ეს მოთხოვნები კიევში რეჟიმის შეცვლის მოთხოვნის თანაბარია, მაშინაც კი, თუ თავის ბოლოდროინდელ განცხადებებში ის ამისკენ პირდაპირ არ მოუწოდებს. ის ფაქტი, რომ პესკოვი პუტინის ამ კომენტარებს ეყრდნობა, ძალიან საეჭვოდ ხდის ვარაუდს, თითქოს რუსეთი თავის პირველად მიზნებზე უარს ამბობს,“ – წერს ISW-ი.
ექსპერტები დასძენენ, რომ პესკოვის ბოლო განცხადებამ უკმაყოფილება გამოიწვია რუსი ნაციონალისტების ბანაკში. კერძო სამხედრო კომპანია „ვაგნერთან“ დაკავშირებულმა ერთ-ერთმა სამხედრო ბლოგერმა დაწერა, რომ „რუსეთი ომს უმიზნოდ აწარმოებს“.
ინსტიტუტის უახლესი ანგარიშის თანახმად, ამ განცხადებების პარალელურად, რუსი პოლიტიკოსები ღიად გამოდიან გენოციდის რიტორიკით.
მოსკოვის საქალაქო დუმის დეპუტატმა და კრემლის ჟურნალისტმა ანდრეი მედვედევმა 23 ნოემბერს ტელეგრამში გამოაქვეყნა ვრცელი პოსტი, რომელშიც კატეგორიულად უარყოფდა უკრაინელი ერის არსებობას და უკრაინულ იდენტობას „პოლიტიკურ ორიენტაციასთან“ აიგივებდა.
მედვედევმა უკრაინას უწოდა სიკვდილის წარმართული კულტი, რომელიც თაყვანს სცემს ტყვეების სიკვდილით დასჯას და ხელისუფლებას „დღევანდელი უკრაინული სახელმწიფოს ლიკვიდაციისკენ“ მოუწოდა.
„ეს არის პირდაპირი მოწოდება გენოციდური ომისკენ უკრაინული სახელმწიფოსა და მისი ხალხის წინააღმდეგ. ამ რიტორიკითაა გაჟღენთილი დისკურსი რუსული პოლიტიკური მეინსტრიმის უმაღლეს დონეებშიც,“ – წერს ISW-ი.
ანალიტიკოსები მიუთითებენ, რომ ამავე რიტორიკას იყენებს პუტინიც, რაც სრულიად შეუთავსებელია მოლაპარაკებებისკენ მოწოდებასთან. ექსპერტების შეფასებით, ერთი მხრივ, ამგვარი განცხადებები, მეორე მხრივ კი, მშვიდობაზე ლაპარაკი მიუთითებს „კრემლის ჩამოუყალიბებლობაზე, ღიად გამოუცხადოს უპირობო ერთგულება ნაციონალისტურ იდეოლოგიას“, რაც პროპაგანდისტების გაკვირვებასა და უკმაყოფილებას იწვევს.
„პუტინი ცდილობს, დააბალანსოს უკიდურესად ნაციონალისტური თეზისები, რათა ნაციონალისტურად განწყობილი საზოგადოების მხარდაჭერა შეინარჩუნოს და შედარებით გაწონასწორებული ნარატივი, რათა შეინარჩუნოს რუსეთის დანარჩენი მოსახლეობის მხარდაჭერა,“ – აღნიშნავს ISW-ი.
ISW-ის ანგარიშის მთავარი მიგნებები:
- რუსეთმა მორიგი მასშტაბური სარაკეტო შეტევა განახორციელა უკრაინის კრიტიკულ ინფრასტრუქტურაზე;
- რუსი პოლიტიკოსები ღიად განაგრძობენ გენოციდის რიტორიკას უკრაინის წინააღმდეგ;
- კრემლი განგებ ცდილობს თავისი მიზნების შენიღბვას, რათა დასავლეთი დააბნიოს და უკრაინას მოლაპარაკებები აიძულოს;
- რუსული წყაროები ამტკიცებდნენ, რომ უკრაინის არმია განაგრძობდა კონტრშეტევას სვატოვო-კრემენაიას მიმართულებაზე;
- რუსეთის არმია განაგრძობდა შეტევას ბახმუტისა და ავდეევკის გარშემო;
- რუსეთის ჯარები განაგრძობდნენ თავდაცვითი პოზიციების გამაგრებას მდინარე დნეპრის აღმოსავლეთ სანაპიროზე;
- რუსეთის ძალები და საოკუპაციო ხელისუფლებები განაგრძობდნენ უკრაინის მოქალაქეების იძულებით გადასახლებას და მათი ქონების კონფისკაციას.
