ომის კვლევის ამერიკული ინსტიტუტის (ISW) შეფასებით, უკრაინელ პარტიზანთა ეფექტიანი თავდასხმები იძულებულს ხდის რუსეთის ხელისუფლებას, თავისი რესურსები ფრონტის ოპერაციებიდან ზურგის რაიონების უსაფრთხოებისკენ მიმართოს.
როგორც დღევანდელ ანგარიშში ინსტიტუტის ანალიტიკოსები წერენ, პარტიზანები მნიშვნელოვნად აუარესებენ რუსეთის შესაძლებლობას, წინააღმდეგობა გაუწიოს უკრაინელთა შეუჩერებელ კონტრშეტევას, რის ფონზეც რუსეთის არმიას შეტევების ძალა აღარ რჩება.
„უკრაინელ პარტიზანთა თავდასხმები შესაძლებელი გახადა ცუდმა რუსულმა ოპერატიულმა უსაფრთხოებამ, ხოლო ცოცხალი ძალის მზარდი დეფიციტი, სავარაუდოდ, კიდევ უფრო აუარესებს რუსების უნარს, ეფექტიანად დაიცვან პარტიზანებისგან ზურგის რაიონები და ამავდროულად, უკრაინელთა კონტრშეტევასაც დაუპირისპირდნენ,“ – წერს ISW.
ISW-ის აზრით, კრემლმა დღემდე ვერ მოახერხა, ეფექტიანი წინააღმდეგობა გაეწია ორგანიზებული უკრაინული პარტიზანული მოძრაობისთვის და ახლა ამას მით უმეტეს ვეღარ შეძლებს.
ინსტიტუტის მონაცემებით, პირველი ნოემბრის მდგომარეობით, ყირიმის გარდა რუსეთს უკრაინაში ოკუპირებული აქვს 85 300 კმ 2, პირადი შემადგენლობის ნაკლებობა კი სერიოზულად უშლის მას ხელს ამ ტერიტორიების შენარჩუნებაში.
ISW-ი ეყრდნობა უკრაინის დაზვერვის ინფორმაციას, რომლის თანახმადაც, რუსებს დაახლოებით 40 000 სამხედრო (თავისი ძალების დიდი ნაწილი) ჰყავთ ოკუპირებულ ხერსონის ოლქში, სადაც რუსეთი დაახლოებით 23 000 კმ2-ს იკავებს.
„ხერსონის ოლქისთვის პრიორიტეტის მინიჭებამ რუსეთის ძალების უსაფრთხოება შეასუსტა ზაპოროჟიეში, დონეცკისა და ლუგანსკის ოლქებში. პარტიზანული თავდასხმები გრძელდება ხერსონისა და ზაპოროჟიეს ოლქებში ამ ტერიტორიების ოკუპაციის შემდეგაც, რაც კიდევ ერთხელ ადასტურებს რუსეთის ძალების უუნარობას, უზრუნველყონ უსაფრთხოება ოკუპირებულ ტერიტორიებზე,“ – აღნიშნავენ ანალიტიკოსები.
ISW-ის თავის ანგარიშში მოყვანილი აქვს 35-მდე შემთხვევა. ყველა ეს თავდასხმა პარტიზანულმა ჯგუფებმა უკრაინის ოკუპირებულ ტერიტორიებზე დაგეგმეს და განახორციელეს – მათ შორისაა კოლაბორაციონისტთა ავტომანქანების აფეთქებები და თავდასხმები საოკუპაციო ადმინისტრაციებზე.
