ფოთში დაიწვა უკრაინელი ხალხის მხარდასაჭერად შეგროვებული ჰუმანიტარული ტვირთი. უკრაინელი მოხალისე ოლგა ლუკიანცევა ამბობს, რომ დაახლოებით 8 – 10 ტონა ჰუმანიტარული ტვირთი 22 ოქტომბერს, ღამით გაჩენილი ხანძრის შედეგად განადგურდა.
მოხალისეების აზრით, პოლიცია ხანძრის ამბავს ეფექტურად არ იძიებს.
„ჩემი აზრით, ხანძარი იყო მიზანმიმართული და დაგეგმილი, რადგან შენობის ფანჯრებზე უკრაინის დროშები მქონდა გამოკრული, ესეც ტერორისტული თავდასხმაა უკრაინელების წინააღმდეგ საქართველოს ტერიტორიაზე. როგორც ჩანს, ვიღაცას სურდა ეს პროვოკაცია, ეს შენობა ეკუთვნოდა კერძო პირს, სადაც ელექტროგაყვანილობაც კი არ იყო“, – ამბობს ოლგა ლუკიანცევა.
მისივე თქმით, უკრაინელმა და ქართველმა მოხალისეებმა ქვეყნის მასშტაბით ერთობლივად შეაგროვეს ჰუმანიტარული ტვირთი და ფოთში ახარისხებდნენ შეგროვებულ ნივთებს. ფოთიდან ჰუმანიტარული ტვირთი სატვირთო მანქანებით უნდა გაეგზავნათ უკრაინაში.
უკრაინიდან დევნილი მოხალისე საყვედურობს ფოთის მერიასაც, რომ რამდენიმე დღით მათ დაცული შენობა არ გამოუყვეს.
„ჩვენ მივმართეთ განცხადებით ფოთის მერიას, რომ გამოეყოთ შენობა რამდენიმე დღით, მაგრამ არ გვიპასუხეს. შემდეგ მოქალაქემ თავისი სურვილით დაგვითმო ეს შენობა ერთი კვირით, ფული არ გადაგვიხდია. ეს იყო ტანსაცმელი, ასევე პირველადი საჭიროების ნივთები, რაც ნაწილი უნდა გაგვეგზავნა უკრაინაში, ნაწილი კი, განკუთვნილი იყო ლტოლვილებისთვის საქართველოში,“ – დასძინა ოლგა ლუკიანცევამ.
შინაგან საქმეთა სამინისტროს ინფორმაციით, გამოძიება დაწყებულია სისხლის სამართლის კოდექსის 188-ე მუხლის შესაბამისად, რაც გულისხმობს სხვისი ნივთის დაზიანებას ან განადგურებას გაუფრთხილებლობით. ამ ეტაპზე დაკავებული არავინ არის.
ოლგა ლუკიანცევა
