რუსეთში ომის ახალი სლოგანი გაჩნდა – „უკრაინის დესატანიზაცია“ – ომის კვლევის ამერიკული ინსტიტუტის (ISW) უახლესი ანგარიშის თანახმად, რუსეთის ოფიციალური პირები სულ უფრო ხშირად ცდილობენ, რუსეთის ომი უკრაინაში რიტორიკულად მიუსადაგონ რელიგიურ კონცეფციებს, რომლებიც ერთნაირად მისაღები იქნება როგორც ქრისტიანებისთვის, ისე მუსლიმებისთვის.
ISW-ს მაგალითად მოჰყავს რამზან კადიროვის გუშინდელი განცხადება, რომელშიც მან რუსეთის „სპეციალურ სამხედრო ოპერაციას“ „სატანისტებთან ქრისტიანებისა და მუსლიმების ომი“ უწოდა.
„უშიშროების საბჭოს მდივნის თანაშემწემ ალექსეი პავლოვმა კიდევ უფრო გააძლიერა კადიროვის ნათქვამი და განაცხადა, რომ ომის მიზანი უკრაინის „სრული დესატანიზაცია“ უნდა იყოს. პავლოვის თქმით, უკრაინული საზოგადოება შედგება „ფანატიკოსებისგან“, რომლებიც უარს ამბობენ რუსული მართლმადიდებელი ეკლესიის, ისლამისა და იუდაიზმის ღირებულებებზე,“ – წერს ომის კვლევის ინსტიტუტი.
ISW-ის შეფასებით, ამგვარი განცხადებები შეიძლება იყოს მცდელობა, გაანელონ რუსეთის შეიარაღებულ ძალებში მყოფი ეთნიკური და რელიგიური უმცირესობების უკმაყოფილება, რომელიც მობილიზაციის ფონზე განსაკუთრებით გამწვავდა.
ინსტიტუტის ანალიტიკოსები მიუთითებენ, რომ რუსეთში ომის მომხრეთა ფლანგი თავდაცვის უწყებისა და უმაღლესი სამხედრო ხელმძღვანელობის გადაწყვეტილებების კრიტიკას განაგრძობს.
ISW-ი ამ ფლანგს „სილოვიკებად“ (ძალოვანები) მოიხსენიებს და ამ ფრთას მიაკუთვნებს ჩეჩნეთის მეთაურს, რამზან კადიროვსა და „ვაგნერის“ დამფუძნებელს, ევგენი პრიგოჟინს.
ინსტიტუტი ეყრდნობა The Washington Post-ის ახალ ცნობასაც, რომლის თანახმადაც, ადამიანი პუტინის უახლესი გარემოცვიდან, რომელმაც პირადად მასთან გამოთქვა უკმაყოფილება ომის მიმდინარეობაზე, სწორედ ევგენი პრიგოჟინი იყო.
ISW-ის ანგარიშის ძირითადი მიგნებები:
- რუსი „სილოვიკები“ კვალავაც განაგრძობენ რუსეთის სამხედრო მოქმედებების კრიტიკას;
- პირდაპირი კონფრონტაცია „სილოვიკებსა“ და პუტინს შორის ომთან დაკავშირებით აჩვენებს, რამდენად მნიშვნელოვანი როლი აქვს ამ დაჯგუფებას რუსეთის სტრუქტურებში;
- სავარაუდოდ, ხერსონიდან ევაკუაცია მოქალაქეების გადასახლების უფრო ფართო პროგრამის ნაწილია;
- რუსული წყაროების ცნობით, უკრაინის ძალებმა სახმელეთო შეტევა მიიტანეს სვატოვოსა და კრემენაიას დასავლეთით;
- რუსეთის არმია განაგრძობდა სარეზერვო და თავდაცვითი პოზიციების გამაგრებას დნეპრის აღმოსავლეთ სანაპიროზე;
- რუსეთის ძალებმა წარუმატებელი სახმელეთო თავდასხმები განახორციელეს დონეცკის ოლქში;
- რუსი სამხედროები განაგრძობენ პირადი შემადგენლობის მობილიზაციას გაწვევის წესების დარღვევით;
- უკრაინელი პარტიზანები თავს დაესხნენ ოკუპირებულ ზაპოროჟიეში რუსეთის მიერ დანიშნული ხელისუფლების მეთაურს.
