ბათუმში, ლერმონტოვის ქუჩის 94ა-ში ხუთსართულიანი კორპუსი დგას. კორპუსის უკანა ეზო პროფესიულ სასწავლებელ „ბლექსის“ ეზოს გადაჰყურებს. ეზოში წლებია ბალახი იზრდება, ბალახს პერიოდულად ცელავს „ბლექსის“ ადმინისტრაცია, თუმცა, კორპუსის მცხოვრებლების თქმით, მოცელილ ბალახს ადგილზევე ტოვებენ.
კორპუსის მცხოვრებლები ამბობენ, რომ მოცელილი ბალახი ლპება და კოღოებისა და ვირთხების საბუდრად იქცევა.
პროფესიულ სასწავლებელ „ბლექსის“ უკანა ეზო
ლერმონტოვის ქუჩის 94ა-ში მცხოვრები ლუდა თხილაიშვილი ასევე გვიყვება, რომ მათი კორპუსის საწვიმარი მილებით ჩამონადენი წყალი ადრე „ბლექსის“ ეზოში მდებარე მილამდე გადიოდა და სანიაღვრე არხს უერთდებოდა, ახლა კი, მას შემდეგ, რაც ეზო მოუვლელია, ალაგ-ალაგ მილები ჩაიხერგა, ამოივსო, ფასადიდან ჩამონადენი წყალი ვეღარსად გადის და კორპუსის საძირკველშივე გროვდება.
„ბალახს ჭრიან ხოლმე და არც გააქვთ, იქვე ტოვებენ. ამით პრობლემა არ გვარდება.
ეზო დაჭაობებულია, ზაფხულში სუნი დგას, ღამით ბაყაყების ყიყინი არ გვაძინებს. რატომ უნდა იყოს ბათუმში ისევ ბაყაყების ყიყინი 21-ე საუკუნეში?!
ეზოს მხოლოდ ბალახის მოჭრა არ შველის, მოსაასფალტებელი ან მოსაპირკეთებელია, გასატანია ნაგვის გროვებიც ამ ეზოდან,“ – ამბობს ლუდა თხილაიშვილი, რომელიც პირველ სართულზე ცხოვრობს. მისი ფანჯრები პროფესიულ სასწავლებელ „ბლექსის“ ეზოს გადაჰყურებს.
პროფესიული სასწავლებელი „ბლექსი” და მისი უკანა ეზო
მარგო ზანდარაძე ამავე კორპუსის მესამე სართულზე ცხოვრობს. მასაც დაჭაობებული ეზოს ხედი აქვს ფანჯრიდან. ამბობს, რომ მესამეკლასელ შვილს სახლის უკანა ეზოში სათამაშოდ ვერასდროს უშვებს, რადგან ეშინია, პროფესიული სასწავლებლის ეზოდან გადმოსულმა ვირთხებმა არ დაკბინონ:
„ვირთხებია ამ ბალახში და ზაფხულობით ქვეწარმავლებიც შეგვინიშნავს.
ზაფხულობით, როცა სიცხე აჭერს, სუნი დგება, ბაყაყების ყიყინია. ჩვენი კორპუსიდან წვიმისას ჩამონადენი წყალი, რაც მაგ ეზოს გავლით მილებით უნდა მიდიოდეს კანალიზაციამდე, ჩვენივე კორპუსის ეზოდან ვეღარ გადის და საძირკველს გვილპობს“ – ამბობს მარგო ზანდარაძე.
გიორგი თავბერიძე და დათო კუნჭულიაც ლერმონტოვის 94ა-ში მდებარე კორპუსის მცხოვრებლები არიან. ისინიც ყოველდღე დაჭაობებულ ეზოს უყურებენ სახლის ფანჯრებიდან.
გიორგი თავბერიძე ამბობს, რომ დაგუბებული წყალი პროფესიული სასწავლებლის ეზოში არასდროს შრება და მისი აზრით, ეზოს მოწესრიგების საკითხი მხოლოდ ბალახის მოჭრით ვერ გადაწყდება:
„სხვანაირად უნდა მოწესრიგდეს ეზო, მოპირკეთდეს ან ასფალტი დაიგოს, სკვერი მოაწყონ, მოედანი ან რამე მსგავსი. მხოლოდ ბალახის მოჭრას რა აზრი აქვს? წყალი გუბდება მოთიბულ ბალახში, ლპება და ჭაობდება. წლებია ასეა“ – ამბობს კორპუსის მცხოვრები.
ლერმონტოვის 94 ა-ში მცხოვრებლები
ბათუმის მერიის პრესსამსახურში გვითხრეს, რომ მერიას და მის სამსახურებს არ ევალებათ პროფესიული სასწავლებლის ეზოს გასუფთავება-მოწესრიგება, რადგან შენობა არ ეკუთვნის მუნიციპალიტეტს და სახელმწიფოს საკუთრებაა, მუნიციპალიტეტისა და სახელმწიფოს ქონებები კი გამიჯნულია.
შენობას და ეზოს ლერმონტოვის ქუჩაზე პროფესიული სასწავლებელი „ბლექსი“ განკარგავს, რომლის დირექტორიც გიორგი გოგიტიძეა. ეზოს გაწმენდა-მოწესრიგების ვალდებულებაც კოლეჯ „ბლექსის“ აქვს.
პროფესიული სასწავლებლის მოუწესრიგებელ ეზოზე აქვს ხედი თავად „ბლექსის“ რამდენიმე აუდიტორიასაც. აუდიტორიებიდან, სადაც ახალგაზრდები იღებენ განათლებას, ასეთი ხედია:
ხედი ეზოზე „ბლექსის“ აუდიტორიიდან
„ბათუმელები“ პროფესიულ სასწავლებელ „ბლექსის“ დირექტორს, გიორგი გოგიტიძეს დაუკავშირდა კომენტარისთვის.
გიორგი გოგიტიძე ამბობს, რომ მოსახლეობას პრობლემები არ უნდა ჰქონდეს პროფესიული სასწავლებლის ეზოსთან დაკავშირებით:
„მოსახლეობას, წესით, „ბლექსის“ ეზოსთან დაკავშირებით არ უნდა ჰქონდეს პრობლემები. მათ მიშენებები გაუკეთეს კორპუსს და გამოიწვიეს დაზიანებები.
ჩვენ იქ ვცელავთ ბალახს სისტემურად. ეს ჭაობის უბანია და კოღო ისეც იქნება.
მე ვერ დაგიდასტურებთ, რომ ჩვენი ეზოდან ესევა მოსახლეობას ვირთხები და კოღო“ – ამბობს გიორგი გოგიტიძე.
პროფესიულ სასწავლებელ „ბლექსის” უკანა ეზო
მას ვკითხეთ, ხედავს თუ არა პრობლემას იმაში, რომ კორპუსის წინ მოსახლეობას დაჭაობებული, მოუვლელი ეზო აქვს, რომლის გაწმენდაც „ბლექსის“ ადმინისტრაციის ვალდებულებაა:
„პრობლემას ვხედავ, მაგრამ ჭაობი არ გვაქვს. წვიმის შემდეგ გუბურები დგება და ეს ჩვეულებრივი ამბავია. ჭაობი სხვა რამეა“ – ამბობს პროფესიული სასწავლებლის დირექტორი.
___
ამავე თემაზე:
ბათუმში ტექნოლოგიური ქალაქი 7 ჰექტარზე გაშენდება – განათლების სამინისტრო
