„ორჯერ მოვუგე სასამართლო ბათუმის მერიას და არ ასრულებენ გადაწყვეტილებას. სასამართლოს გადაწყვეტილებასაც როცა არ ასრულებენ, ვის მივმართო?“ – კითხულობს ბათუმში, ფრიდონ ხალვაშის გამზირზე მცხოვრები შოთა დევაძე. მან მოსამართლე ჯუმბერ ბეჟანიძის მიერ 2021 წლის 12 ნოემბერს გამოცემული აღსრულების ფურცელი გვაჩვენა, რომელიც ამ დრომდე ბათუმის მერიაში არ შეუსრულებიათ.
სასამართლოს კანონიერ ძალაში შესული გადაწყვეტილება დაუყოვნებლივ უნდა შესრულდეს. მისი შეუსრულებლობა კი, სისხლის სამართლის დანაშაულია.
მოქალაქე შოთა დევაძე 2018 წლიდან დავობს სასამართლოში. ის 80 წლისაა. მოპასუხე კი, ბათუმის მერიის სტრუქტურული ერთეულია – თვითნებურად დაკავებულ მიწაზე საკუთრების უფლების აღიარების კომისია, რომელმაც სასამართლოში დავის დაწყებამდე მეჯინისწყლის დასახლებაში მცხოვრებ შოთა დევაძეს საკარმიდამო მიწასთან მდებარე ნაკვეთის დაკანონებაზე უარი უთხრა.
„დღემდე ვერ ვიგებ პასუხს, რატომ მეუბნება მერია უარს. ამ მიწას ჩვენ ვიყენებთ 90-იანი წლებიდან, სათიბი მქონდა, ნარგავები მაქვს, ხეხილი, წლების წინ შვრიასაც ვთესავდი…
ჩემის სახლის მეორე მხარეს საბავშვო ბაღია. რადგან მე და ჩემს მეუღლეს შვილი არ გვყავს, მიწის ნაწილი საბავშვო ბაღს დავუთმე, დაახლოებით 400 კვადრატული მეტრი. გვიხარია, ბავშვები გამოდიან, თამაშობენ…
მიწა, რომლის აღიარებასაც ვითხოვ საკუთრებაში, მეორე მხარესაა, ზუსტად 943 კვადრატული მეტრია და არ მიკანონებენ. ივანიშვილი ხომ არ ვარ, რომ ბევრი ქონება მქონდეს და მივცე ვინმეს?“ – ამბობს შოთა დევაძე.
„ბათუმის საკუთრების უფლების აღიარების კომისია კანონს არღვევს, გამოძიება უნდა დაიწყოს და დადგინდეს, რა მიზეზით ვერ აღასრულა ამ დრომდე სასამართლოს გადაწყვეტილება კომისიამ,“ – ამბობს პაატა დიასამიძე, „ახალგაზრდა იურისტთა ასოციაციის“ აჭარის ფილიალის ხელმძღვანელი.
იურისტი ყურადღებას ამახვილებს იმაზე, რომ სადავო მიწის ნაკვეთზე აპრილის დასაწყისში ბათუმის მერიას ატრაქციონების განთავსება დაუწყია.
„ეს დაიწყეს მიუხედავად იმისა, რომ ბათუმის მერიაში კარგად იციან სასამართლოს გადაწყვეტილების შესახებ, რაც ამ მიწის ნაკვეთს უკავშირდება. აღსრულების ფურცელი გამოიცა 2021 წლის ნოემბერში და მანამდე იყო სასამართლოს სამი ინსტანციის გადაწყვეტილებები, მათ შორის, უზენაესი სასამართლოს გადაწყვეტილება. ეს აჩვენებს იმას, რომ მიზანმიმართულად აჭიანურებს კომისია სასამართლოს გადაწყვეტილებას აღსრულებას“, – აღნიშნა პაატა დიასამიძემ „ბათუმელებთან“.
საია-ს იურისტი განმარტავს, რომ კომისიას მოსამართლემ ამ შემთხვევაში არჩევანი არ დაუტოვა – მან მოქალაქეს მიწის კონკრეტულ ნაკვეთზე საკუთრება უნდა უღიაროს.
„…გამოსცეს ახალი ადმინისტრაციულ-სამართლებრივი აქტი ბათუმში, მეჯინისწყალზე მდებარე 943 კვადრატული მეტრი მიწის ნაკვეთზე შოთა დევაძის საკუთრების უფლების აღიარების შესახებ“, – სასამართლოს გადაწყვეტილების ჩანაწერს გვიკითხავს იურისტი.
ასე კატეგორიულად მოსამართლე ჯუმბერ ბეჟანიძეს გადაწყვეტილებაში მას შემდეგ ჩაუწერია, როცა გაირკვა, რომ მანამდე მის მიერ მიერ მიღებულმა გადაწყვეტილებამ არაფერი შეიცვალა – შოთა დევაძემ უკვე ორჯერ მოიარა სასამართლოს სამი ინსტანცია. წინა შემთხვევაში მოსამართლემ ბათუმის მერიის საკუთრების უფლების აღიარების კომისიას საკითხის ხელახლა განხილვა დაუვალებია, კომისიამ შოთა დევაძის საქმე მართლაც ხელახლა განიხილა, მაგრამ ისევ უარი თქვა. როგორც მოსამართლე ჯუმბერ ბეჟანიძემ გაარკვია, კომისიამ გადაწყვეტილება ისევ საკითხის გამორკვევის გარეშე მიიღო.
„მივმართავ პროკურატურას, რომ სასამართლოს გადაწყვეტილება აღსრულდეს, სხვა რა გზაა, განმიმარტოს სახელმწიფომ,“ – იმ საჯარო მოხელეების დასჯას ითხოვეს შოთა დევაძე, რომლებიც სასამართლოს გადაწყვეტილებას არ ასრულებენ.
რატომ არ აღასრულეს სასამართლოს გადაწყვეტილება ბათუმის მერიაში? – მერიის პრესცენტრში გვიპასუხეს, რომ საკუთრების აღიარების კომისიას დაუკავშირდნენ და პასუხს მიღებისთანავე გაგვაცნობენ.
