გონიოს პოლიგონის პრობლემა, კანალიზაციის სისტემისთვის გამოყოფილი თანხის კოვიდბიუჯეტში გადარიცხვა, ნაგავსაყრელი და ჭოროხის გზა, რომელიც არ გაკეთდა – ეს 4 პრობლემა ბათუმის მე-4 მაჟორიტარულ ოლქიდან 30 მარტს შემაჯამებელ ბრიფინგზე დაასახელა ბათუმის საკრებულოს ოპოზიციამ. 2 აპრილს ბათუმის მე-4 მაჟორიტარულ ოლქში შუალედური არჩევნებია. ეს არჩევნები გადაწყვეტს, ბათუმის საკრებულო ოპოზიციური იქნება თუ არა.
„არ აირჩიოთ ჩიქოვანის კლანი საკრებულოში,“ – ამბობს ბათუმის საკრებულოს წევრი ენმ-დან რეზო ხარაზი. ის ბრიფინგზე სახელმწიფო აუდიტის დასკვნებით მოვიდა, რომლის მიხედვითაც, არსებობს კითხვები ბათუმის ბიუჯეტის მიზნობრივად ხარჯვაზე.
„გონიოს პოლიგონი დარჩა პოლიგონად, მიმდებარე ტერიტორია ვერ განვითარდა, ჩიქოვანი-რიჟვაძის გადაწყვეტილებით, ადლიის მცხოვრებლებს, შემოერთებულ ტერიტორიებს, ჯიბიდან ამოაცალეს 60 მილიონი და გადარიცხეს კორუფციულ კოვიდფონდში [იგულისხმება KFW-ის მიერ 2019 წელს ბათუმის კანალიზაციის სისტემის მოსაწყობად გამოყოფილი 60 მილიონი ევრო], ამავე ოლქში უმძიმეს პრობლემად რჩება ნაგავსაყრელი, სადაც 5 მილიონი მოიპარეს, 2016 წელს დაწყებული ჭოროხის გზის მშენებლობა არ დასრულდა…
ამ ყველაფრის შემოქმედი ადამიანი გვერდით კაბინეტში ზის, ეს მავნებლობა უნდა დასრულდეს,“ – განაცხადა რეზო ხარაზმა.
მაჟორიტარულ ოლქში, სადაც 2 აპრილს არჩევნებია, ერთსა და იმავე მისამართზე მინიმუმ 338 ახალი ამომრჩეველია. საია მიიჩნევს, რომ კანონი ირღვევა, თუმცა ამ დრომდე გამოძიება არ დაწყებულა, რომელმაც, წესით, უნდა გაარკვიოს, გვაქვს თუ არა საქმე ამომრჩევლის მოსყიდვასთან ან იძულებასთან.
იძულებაში იგულისხმება მოცემულობა, როცა „ოცნების ქალაქის“ ტერიტორიაზე ახალი საცხოვრებელი კორპუსები შენდება. ადამიანებმა კი, რომლებიც აქ წლებია ცხოვრობენ, არ იციან, ბინა მოუწევთ თუ არა. ეს ადამიანები ამ მაჟორიტარული ოლქის ამომრჩევლები გახდნენ საგანგებოდ 2 აპრილის არჩევნების წინ და მათ „ოცნების“ კანდიდატის მხარდაჭერას პირდაპირ აჭარის მთავრობის თავმჯდომარე – თორნიკე რიჟვაძე სთხოვს, ვისაც მარტივად შეუძლია გადაწყვიტოს – ვის ერგება ბინის გასაღები.
„ნაციონალურმა მოძრაობამ“ მიმართა ბათუმის საქალაქო სასამართლოსაც, სადაც საარჩევნო ფორმატში განიხილავენ ამომრჩევლის მოსყიდვის შესაძლო შემთხვევას. აქ ოპოზიცია ითხოვს „ქართული ოცნების“ კანდიდატს, რამაზ ჯინჭარაძეს კანდიდატის რეგისტრაცია გაუუქმდეს.
ენმ-ს ინფორმაციით, სასამართლო სხდომა ხვალ, 31 მარტს, ჩაინიშნა და საქმეს მოსამართლე ჯუმბერ ბეჟანიძე განიხილავს.
————-
ბათუმის საკრებულოს წევრს შუალედურ არჩევნებზე, 2 აპრილს, მხოლოდ ბათუმის №4 მაჟორიტარულ ოლქში აირჩევენ, რადგან გასული წლის ოქტომბერში ამ ოლქში არჩეული ნუგზარ ფუტკარაძე 2021 წლის 18 ნოემბერს გარდაიცვალა. 24 ნოემბერს კი „ერთიანმა ნაციონალურმა მოძრაობამ“ გაავრცელა აუდიოჩანაწერი, რაც, პარტიის მტკიცებით, ადასტურებს იმას, რომ ნუგზარ ფუტკარაძის მოსყიდვას ცდილობდნენ 100 ათასი დოლარის სანაცვლოდ. თანხმობის შემთხვევაში ოპოზიცია უმრავლესობას საკრებულოში დაკარგავდა.
მიუხედავად იმისა, რომ არჩევნები 2021 წლის ოქტომბერში ჩატარდა, ამ დრომდე ბათუმში საკრებულო არ მუშაობს – საკრებულო ვერ ირჩევს თავმჯდომარეს და სხვა თანამდებობის პირებს. საკრებულოში ძალთა ბალანსი ახლა ასეა: 17 – 17 და ასეა მას შემდეგ, როცა გახარიას პარტიიდან საკრებულოში შესულმა წევრმა ირაკლი თავდგირიძემ კი თქვა, რომ ის „ნაციონალურ მოძრაობას“ მხარს არ დაუჭერს და დამოუკიდებელი დეპუტატი გახდა.
„ნაციონალურმა მოძრაობამ“ ბათუმის №4 მაჟორიტარულ ოლქში შუალედურ არჩევნებზე ბათუმის საკრებულოს წევრობის კანდიდატად ნუგზარ ფუტკარაძის შვილი, მათე ფუტკარაძე. მისი კონკურენტი „ქართული ოცნებიდან“ რამაზ ჯინჭარაძეა.
