დღეს, 29 მარტს, თურქეთის თავდაცვის მინისტრმა ჰულუსი აკარმა განაცხადა, რომ შავი ზღვის თურქეთის ტერიტორიულ წყლებს ყურადღებით აკვირდებიან ნაღმების აღმოსაჩენად და მზადყოფნაშია ნაღმსატყორცნები და საზღვაო საპატრულო თვითმფრინავები.
მისი თქმით, ნაღმების აღმოჩენის შემთხვევაში მიიღება შესაბამისი ზომები მათ გასანეიტრალებლად. ინფორმაციას თურქული გამოცემა „ანადოლუ“ ავრცელებს.
თურქეთის თავდაცვის მინისტრმა აღნიშნა, რომ თურქეთმა უკვე გაავრცელა შეტყობინება გემების კაპიტნების გასაფრთხილებლად მოსალოდნელი ნაღმების შესახებ.
მინისტრმა აღნიშნა, რომ მონაცემები საზღვაო ნაღმების რაოდენობის შესახებ განსხვავებულია.
„თურქეთმა უსაფრთხოების ზომები მიიღო. ჯერ ნაადრევია იმის თქმა, არის თუ არა ეს ის ნაღმები, რომლებიც უკრაინის სანაპიროებთან მოხვდა ზღვაში, თუ ეს სხვა ასაფეთქებელი მოწყობილობებია. გამოძიება გრძელდება“, – განაცხადა მინისტრმა.
მან აღნიშნა, რომ თურქეთი არ განიხილავს რუსეთთან ან უკრაინასთან თურქეთის ტერიტორიულ წყლებში ნაღმების აღმოჩენის საკითხს.
„ჩვენ დავამყარეთ მჭიდრო კავშირი მეზობელ რუმინეთთან და ბულგარეთთან. რუსეთთან თანამშრომლობა განსხვავებული საკითხია და შავ ზღვაში სავაჭრო გადაზიდვების კოორდინაციას ეხება“, – განაცხადა მან.
თურქეთის თავდაცვის სამინისტრომ თურქეთის ტერიტორიულ წყლებში, შავ ზღვაში, ნაღმის აღმოჩენის შესახებ შაბათს, 26 მარტს, განაცხადა. იმავე დღეს თურქეთმა შავ ზღვაში თევზაობა შეაჩერა უსაფრთხოების მიზნით. მეორე დღეს შავ ზღვაში, თურქეთის ტერიტორიულ წლებში, ბულგარეთთან ახლოს, კიდევ ერთი ნაღმი აღმოაჩინეს.
მედიის ცნობით, რუსეთმა რამდენიმე დღის წინ განაცხადა, რომ საბრძოლო მოქმედებების დროს რამდენიმე ნაღმი დინებამ წაიღო უკრაინის პორტებიდან და შესაძლოა, ეს სწორედ ის ნაღმები იყოს. თურქეთის თავდაცვის სამინისტრო აცხადებს, რომ აღმოჩენილი ნაღმები „ძველი სტილისაა“.
