დღეს, 18 მარტს, უკრაინაში, ქალაქ ლვოვის ცენტრალური ბაზრის მოედანზე, 109 ცარიელი საბავშვო ეტლი განათავსეს იმის ნიშნად, რომ 24 თებერვლიდან დღემდე, მას შემდეგ, რაც რუსეთი უკრაინას დაესხა თავს, უკრაინაში 109 ბავშვი დაიღუპა საომარი მოქმედებების შედეგად.
უკრაინის ომბუდსმენის, ლუდმილა დენისოვას განცხადებით, წინასწარი გამოძიების ცნობით, რუსეთის ფედერაციის უკრაინაში შეჭრის დაწყებიდან 109 ბავშვი დაიღუპა და 130-ზე მეტი დაშავდა.
- „დაღუპული და დაჭრილი ბავშვების რეალური რაოდენობის დადგენა შეუძლებელია, რადგან უკრაინის ქალაქებში საოკუპაციო ჯარები აქტიურ საბრძოლო მოქმედებებს ატარებენ.
- ხარკოვის ოლქის ზოლოჩივის რაიონში დედამ 4 წლის ქალიშვილი საკუთარი სიცოცხლის ფასად გადაარჩინა. იგი დაბომბვისას ბავშვს სხეულით გადაეფარა.
- გუშინ ოკუპანტებმა კიევის რაიონში საცხოვრებელი სახლები დაბომბეს. ამ დროისთვის ცნობილია ორი წლის ბავშვის გარდაცვალების და ოთხი ადამიანის დაშავების შესახებ.
- ️მოვუწოდებ საერთაშორისო საზოგადოებას და უფლებადამცველ ორგანიზაციებს, წვლილი შეიტანონ ბავშვთა უფლებების დარღვევის შესაჩერებლად და გააძლიერონ ზეწოლა რუსეთის შესაჩერებლად.
ნატოს ქვეყნებო – დაკეტეთ ცა!“ – წერს ლუდმილა დენისოვა ფეისბუქზე.
___________________
ფოტო: ევროპის პრესფოტო სააგენტო. EPA-EFE/MICHELE ESPOSITO