ბათუმის მერიამ ადმინისტრაციული შენობების სახურავებისა და საკრებულოს სხდომათა დარბაზის შეკეთებაზე ტენდერი გამოაცხადა. სატენდერო თანხა 154 ათას 194 ლარია.
სამუშაოები გამარჯვებულთან ხელშეკრულების დადებიდან 90 დღეში უნდა დასრულდეს. წინადადებების მიღება კი, 25 მარტს დაიწყება და 28 მარტს დასრულდება.
ლადო ასათიანის ქუჩაზე მდებარე ბათუმის მუნიციპალიტეტის ადმინისტრაციული შენობა კულტურული მემკვიდრეობის ძეგლია.
ბათუმის საკრებულოს სხდომათა დარბაზი / ფოტოები ტენდერიდან
სატენდერო დოკუმენტების მიხედვით, შესაკეთებელია მუნიციპალიტეტის ადმინისტრაციული – ლ. ასათიანის ქ. N25-ში და ს.ს. ორბელიანის ქ. N10-ში – მდებარე შენობების სახურავები. ორბელიანის ქუჩაზე მდებარე შენობაზე უნდა მოეწყოს ასევე საჩრდილობელი და გასარემონტებელია საკრებულოს სხდომათა დარბაზი [ლ. ასათიანის ქ. N25-ში].
ბათუმის მერიის ადმინისტრაციული შენობის სახურავი / ლ. ასათიანის ქუჩა/ ფოტო ტენდერიდან
განმარტებით ბარათში აღნიშნულია, რომ „დარბაზის ჭერიდან ფრაგმენტულად ჩამოვარდნილია ლესვითი კარნიზი, რისი მიზეზიც საინჟინრო ექსპერტიზის გამოკვლევისა და ვიზუალური დათვალიერების მიხედვით, ოთახის სივრცეში შემოღწეული ატმოსფერული წყალია. წყალი სივრცეში აღწევს შენობის დაზიანებული სახურავის ფენილისა და გაუმართავი წყალსადინარი სისტემის მეშვეობით. აღნიშნულის გამო სასხვენო გადახურვის მონოლითური რკინა-ბეტონის ფილაში გამოყენებული კონსტრუქციული ლითონის კოჭი სინესტისგან კოროზირებულია, რამაც გამოიწვია ფილასა და ნალესს შორის რღვევის პროცესის განვითარება.“
ექსპერტიზის დასკვნაში კი აღნიშნულია, რომ საკრებულოს სხდომათა დარბაზში ჭერის დაზიანებების მიზეზი ასევე არის „[თავის დროზე] ლესვის სამუშაოების არასათანადოდ შესრულება“. გარდა ამისა, დანესტიანებულია სხდომათა დარბაზის კედლებიც, რაც „სათათბირო ოთახში მყოფთათვის გარკვეული საფრთხის შემცველია, იმის გარდა, რომ სინესტე კედლების ესთეტიკურ შესახედაობას აზიანებს“.
ბათუმის მერიის ადმინისტრაციული შენობა ორბელიანის ქუჩაზე და რენდერი პროექტიდან
ბათუმის საკრებულოს დარბაზის ავარიულობის გამო ახალარჩეული საკრებულოს პირველი სხდომა ბათუმის რუსთაველის სახელმწიფო უნივერსიტეტში ჩატარდა. სხდომა იმავე დღეს ჩაიშალა და მას შემდეგ საკრებულო, რომელმაც მერიის საქმიანობაც უნდა აკონტროლოს, აღარ შეკრებილა.
—
ახალარჩეული საკრებულო პირველად 2021 წლის 3 დეკემბერს შეიკრიბა, თუმცა სხდომა ისე ჩაიშალა, რომ თავმჯდომარე ვერ აირჩიეს. საკრებულოს თავმჯდომარე დღემდე არ ჰყავს.
შემდეგი მცდელობა საკრებულოს შეკრების იყო ბათუმის ხელოვნების უნივერსიტეტის შენობაში, თუმცა
2022 წლის 2 აპრილს კი, ბათუმში საკრებულოს მაჟორიტარი წევრის არჩევნები გაიმართება. ადლიის საარჩევნო ოლქში ბათუმის საკრებულოს მაჟორიტარი დეპუტატი „ერთიანი ნაციონალური მოძრაობის“ წევრი, ნუგზარ ფუტკარაძე იყო. იგი 2021 წლის ნოემბერში, ახალი საკრებულოს შეკრებამდე გარდაიცვალა.
ამავე თემაზე:
14 საარჩევნო უბანი, 20 202 ამორჩეველი და 2 კანდიდატი – შუალედური არჩევნები ბათუმში
