უკრაინის პრეზიდენტმა ვოლოდიმირ ზელენსკიმ იაპონიას მიმართა პარლამენტში პირდაპირი ჩართვის თხოვნით – ინფორმაციას ამის შესახებ იაპონური მედია ავრცელებს.
მედიის ცნობით, იაპონიის მთავრობა და მმართველი კოალიცია დაინტერესებულია ამ საკითხით და ამჟამად განიხილება ტექნიკური დეტალები.
„ზელენსკის გამოსვლა საშუალებას მისცემს იაპონიის პარლამენტს, გამოხატოს თავისი დამოკიდებულება ამ საკითხისადმი მთელს ქვეყანაში და მსოფლიოში,“ – უთხრა ჟურნალისტებს მმართველი, ლიბერალურ-დემოკრატიული პარტიის ლიდერმა პარლამენტში, ციუოში ტაგაკიმ.
მედიის ცნობით, იაპონიის პარლამენტის ერთ-ერთი ოპოზიციური პარტიის ლიდერმა ტვიტერზე დაწერა, რომ ამ საკითხის განხილვა არ შეიძლება მხოლოდ ტექნიკური კუთხით და მსგავსი გამოსვლა უნდა შედგეს მას შემდეგ, რაც იაპონიის პრემიერ-მინისტრი კიშიდა და ზელენსკი მოლაპარაკებებს გამართავენ და ერთობლივ განცხადებებს გააკეთებენ.
ოფიციალური ტოკიო გმობს რუსეთის თავდასხმას უკრაინაზე. მეტიც, 8 მარტს იაპონიის თავდაცვის სამინისტრომ უკრაინას თავდაცვის აღჭურვილობა გაუგზავნა . ეს იყო პირველი შემთხვევა მეორე მსოფლიო ომის შემდეგ, როცა იაპონიამ უცხო ქვეყანას სამხედრო აღჭურვილობა გადასცა.
„როიტერსის“ ცნობით, ზელენსკის იაპონიის პარლამენტში გამოსვლის სავარაუდო თარიღად 22 მარტი სახელდება.
უკრაინის პრეზიდენტი ზელენსკი სხვადასხვა ქვეყნის საკანონმდებლო ორგანოში პირდაპირი ჩართვის საშუალებით მიმართავს ქვეყნებს, მხარი დაუჭირონ ომში, რომელიც 24 თებერვალს რუსეთმა დაიწყო უკრაინის წინააღმდეგ და რომელსაც მშვიდობიანი მოქალაქეების დაღუპვა და უკრაინის ქალაქებისა და სოფლების ნგრევა მოჰყვა.
გუშინ, 17 მარტს, ზელენსკიმ გერმანიის ბუნდესტაგს მიმართა სიტყვით და კანცლერ შოლცს მოუწოდა „ევროპაში მშვიდობის წინააღმდეგ აგებული კედლის დანგრევისკენ“. მანამდე კი ზელენსკიმ პირდაპირი ჩართვით მიმართა ევროპარლამენტს, ბრიტანეთის პარლამენტსა და აშშ-ის კონგრესს. მისი მიმართვა ყოველჯერზე ემოციური და, ამავე დროს, კრიტიკული იყო.
უკრაინის პრეზიდენტი მსოფლიოს განვითარებულ ქვეყნებს უკრაინის ღია და გაბედული მხარდაჭერისკენ მოუწოდებს.
ზელენსკის საქართველოს პარლამენტში პირდაპირი ჩართვით მოწვევის ინიციატივით გუშინ, 17 მარტს, „ლელო“ გამოვიდა. ინიციატივას მხარს უჭერს „ერთიანი ნაციონალური მოძრაობაც“, თუმცა მმართველი პარტია, „ქართული ოცნება“ აცხადებს, რომ ამ ინიციატივის განხილვას არ აპირებენ და ოპოზიციას მხოლოდ პიარი და „ისტერიის აწევა“ სურს.
