რუსეთის მოქალაქეები სოციალურ ქსელში ომის წინააღმდეგ აქციას აორგანიზებენ. „მომისმინე. ეს არ არის ჩემი ომი. ეს პუტინისაა. ეს არ არის ჩემი რუსეთი – პუტინისაა. მე არა ვარ პუტინი… აი, ჩემი რუსეთი – არა ომს. აი ჩემი რუსები – პატიოსანი, თავისუფალი. გამოდით ომის წინააღმდეგ“, – ამ შინაარსის ვიდეო რგოლი სოციალურ ქსელ ტელეგრამში ვრცელდება.
აქციის ორგანიზატორების თქმით, „რუსეთში დღეს უკრაინის მხარდასაჭერად დიდი აქცია გაიმართება. ხალხმა უნდა ვაჩვენოთ, რომ ჩვენ ომს ვეწინააღმდეგებით. მთავარი აქცია მოსკოვში მანეჟის მოედანზე გაიმართება“.
აქციის ორგანიზატორების ინფორმაციით, საპროტესტო აქცია გაიმართება პეტერბურგში და ასევე ყველა სხვა დიდ ქალაქში – ქალაქების ცენტრალურ მოედანზე.
გეგმის მიხედვით აქცია უნდა დაიწყოს მოსკოვის დროით 14:00 საათზე.
პარალელურად რუსეთში გრძელდება იმ ადამიანების დაკავება, რომლებიც ომს აპროტესტებენ. მაგალითად, დღეს ქალაქ ომსკში რუსულმა გვარდიამ უკვე დაშალეს აქცია, რომლის მონაწილეებიც უკრაინაში ომს აპროტესტებდნენ.
მილიცია სასტიკად უსწორდება ცალკეულ ადამიანებსაც – დღეს ათზე მეტმა მილიციელმა ჯერ თოვლში დამარხა ერთი კაცი, შემდეგ კი ხელკეტებით სცემეს და წაიყვანეს.
ორგანიზატორები ითხოვენ, რომ აქციის შესახებ ინფორმაცია მაქსიმალურად გაუგზავნონ მეგობრებს რუსეთში. მათი თქმით, „ეს არის ბოლო შანსი ომის შესაჩერებლად“.
ბოლო დღეებში რუსეთის დუმამ არაერთი კანონი მიიღო, რომლის მიხედვითაც უკრაინასთან მიმართებაში სიტყვა „ომის“ ხსენებაც კი დასჯადი გახდა კანონმდებლობით.
