დღეს, 25 თებერვალს, საქართველოს პარლამენტს საგანგებო სხდომა უნდა მოეწვია უკრაინასთან დაკავშირებით, თუმცა „ქართულმა ოცნებამ“ ეს სხდომა ჩაშალა.
საპარლამენტო ოპოზიციამ დღეს პარლამენტში უკრაინის ჰიმნი გააჟღერა და განაცხადა, რომ პარლამენტის თავმჯდომარე კონსტიტუციის წინააღმდეგ წავიდა.
„დღეს არის სირცხვილის დღე საქართველოს პარლამენტში, დღეს არის სირცხვილის დღე საქართველოს ისტორიაში და არა მარტო საპარლამენტო ცხოვრებაში, რადგან უმრავლესობამ სრულიად სამარცხვინოდ შეაგროვა ხელმოწერები და გადაწყვიტა, რომ ჩაეშალა დღეს საქართველოს კონსტიტუციის დარღვევით, საქართველოს პრეზიდენტის მიერ მოწვეული პარლამენტის სხდომა.
პარლამენტის სამარცხვინო თავმჯდომარემ პაპუაშვილმა, რომლის სახელი ისტორიაში არ დარჩება და დარჩება მხოლოდ იმ გმირების სახელი, რომლებიც ახლა იბრძვიან კიევში, გადაწყვიტა, რომ საქართველოს კონსტიტუციის წინააღმდეგ წავიდეს და საპარლამენტო დარბაზი ჩაგვიკეტოს, ჩაუკეტოს საქართველოს მოქალაქეებს, უკრაინას. იმისთვის, რომ დღეს აქ უნდა გაგვეჟღერებინა უკრაინის ჰიმნი და გვეთქვა მსოფლიოსთვის, რომ ჩვენ ოკუპირებულები ვართ“ – განაცხადა დღეს ხატია დეკანოიძემ პარლამენტში.
ოპოზიცია ამბობს, რომ ისინი დღეს ერთად დგანან, მიუხედავად მათი განსხვავებისა პოლიტიკაში, იმის მიუხედავად, როგორ აფასებენ წარსულს და მომავალსაც კი.
„ჩვენ აწმყოს საზოგადოებასთან ერთად შევაფასებთ იმ ისტორიულ ფაქტებზე დაყრდნობით, რომელიც დღეს მიდის საქართველოს პარლამენტში“ – ამბობს ხატია დეკანოიძე.
ის მიმართავს უმრავლესობის წევრებს:
„მათ, ვისაც დღეს ხელი მოგაწერინათ ბიძინა ივანიშვილმა და შეიძლება ითქვას პუტინმა, იმ სამარცხვინო წერილზე, რომ დღეს სხდომას არ დაესწროთ აქ, ეს იქნება თქვენი ყველაზე ცუდი და სირცხვილის გადაწყვეტილება, რაც, სამწუხაროდ, დარჩება საქართველოს ისტორიას“.
ამ გამოსვლის შემდეგ საპარლამენტო ოპოზიციამ პარლამენტის ფოიეში უკრაინის ჰიმნი გააჟღერა.
ოპოზიცია მოითხოვდა, რომ უკრაინის მოვლენებთან დაკავშირებით პარლამენტს საგანგებო სხდომა მოეწვია და ემსჯელა შექმნილ კრიზისზე.
