უკრაინის სამთავრობო უწყებები დღეს დილიდან ავრცელებენ ინფორმაციას გაძლიერებული რუსული დეზინფორმაციის შესახებ. უკრაინა განსაკუთრებული სიფრთხილისკენ მოუწოდებს საერთაშორისო საზოგადოებასა და ჟურნალისტებს და სთხოვს კარგად გადაამოწმონ წყაროები, რაზე დაყრდნობითაც იღებენ ან/და ავრცელებენ ინფორმაციას.
უკრაინის საგარეო საქმეთა სამინისტრომ გამოაქვეყნა სახელმწიფო უწყებების ვებგვერდებისა და სოციალური ქსელების მისამართებიც.
უკრაინის სხვადასხვა რეგიონსა და ქალაქში გრძელდება საომარი მოქმედებები. ამ პირობებში, უკრაინელი ჟურნალისტები რჩებიან ადგილზე და აშუქებენ მიმდინარე მოვლენებს.
უკრაინული მედია-გამოცემა Kyiv Independent მკითხველებს მხარდაჭერას სთხოვს:
„უკრაინა უპრეცედენტო თავდასხმის წინაშე დგას. Kyiv Independent აგრძელებს მუშაობას და მსოფლიოს სანდო, მნიშვნელოვან ინფორმაციას აწვდის ადგილზე არსებული ფაქტების შესახებ. ჩვენ გვჭირდება თქვენი მხარდაჭერა ამ რთულ და არაპროგნოზირებად საქმეში. კიბერშეტევებიდან, დაბომბვებიდან, სახმელეთო შემოსევებიდან – ძნელია იმის პროგნოზირება, თუ რას მოიტანს მომავალი დღეები და რასთან მოგვიწევს გამკლავება“.
Kyiv Independent სამი თვის წინ შეიქმნა, მას შემდეგ რაც 8 ნოემბერს, უკრაინაში 26 წლიანი ისტორიის მქონე ინგლისურენოვანი გამომცემლობა Kyiv Post-ი მფლობელმა დახურა და მთელი სარედაქციო გუნდი დაითხოვა. ჟურნალისტებმა ეს სარედაქციო დამოუკიდებლობის დაცვის გამო მათზე შურისძიებად მიიჩნიეს და ახალი გამოცემა შექმნეს.
„ეს იყო დამოუკიდებელი Kyiv Post-ის დასასრული, მაგრამ არ უნდა გახდეს უკრაინიდან ხარისხიანი ადგილობრივი ჟურნალისტიკის დასასრული“ – აცხადებს Kyiv Independent-ის გუნდი.
Kyiv Independent-ის ჟურნალისტები უკრაინაში რჩებიან და აგრძელებენ მუშაობას. მათი თქმით, ახლა როგორც არასდროს, როცა რუსული ძალები აქტიურად ავრცელებენ დეზინფორმაციას, გადამწყვეტია მსოფლიოსთვის უკრაინიდან სანდო სიახლეების მიწოდება. ამაში დახმარებისთვის კი შეგიძლიათ გაიღოთ ერთჯერადი დონაცია ან/და გახდეთ გამომწერი რეგულარული შემოწირულობისთვის.
_________________________
მსურველებს ასევე შეუძლიათ დონაცია კრიპტოვალუტის გამოყენებით.
BTC
bc1q444wayyye4jke3ty87sdvm77dwkysz9hwcyu6u
ETH
0x91cEF11e06B229396b45b2716e548f8c5eF98428
