„საქართველოს პრეზიდენტის ადმინისტრაციამ 2019 -2021 წლებში რამდენჯერმე მიმართა საქართველოს მთავრობის ადმინისტრაციას იმისთვის, რომ გადმოსცემოდა პრეზიდენტის ადმინისტრაციას გრიფით განსაზღვრული სამართლებრივი აქტები, მაგრამ მიუხედავად მრავალგზის მიმართვისა, დღემდე აღნიშნული დოკუმენტაცია არ მიუღია პრეზიდენტის ადმინისტრაციას. შესაბამისად, ჩვენ, პრეზიდენტის ადმინისტრაცია, მოკლებულია შესაძლებლობას დღეის მდგომარეობით იმსჯელოს აღნიშნულ დოკუმენტებზე და მათ გასაიდუმლოებაზე,“ – აღნიშნა პრეზიდენტ სალომე ზურაბიშვილის ადმინისტრაციის უფროსმა, ნათია სულავამ, დღეს, 21 თებერვალს, გამართულ ბრიფინგზე.
ექსპრეზიდენტი მიხეილ სააკაშვილი 18 თებერვალს გავრცელებული ღია წერილითსალომე ზურაბიშვილს სთხოვს, სახელმწიფო დაცვის სპეციალური სამსახურის მიერ პრეზიდენტის ადმინისტრაციისთვის 2013 წელს გაწეულ ხარჯებს მოხსნას გრიფი „საიდუმლო“.
პრეზიდენტის ადმინისტრაციის უფროსის განმარტებით, პრეზიდენტის მიერ გამოცემული გრიფით „საიდუმლო“ დოკუმენტების რეგისტრაციას, შენახვას და დაარქივებას უშიშროების საბჭოს აპარატი 2018 წლიდან აღარ ახორციელებს.
„ამის შემდეგ სახელმწიფო უშიშროების საბჭოს აპარატის სამართალმემკვიდრედ განისაზღვრა საქართველოს მთავრობა. შესაბამისად, ეროვნული უშიშროების საბჭოში დაცული ყველა დოკუმენტი გადაგზავნილ იქნა დაუყოვნებლივ საქართველოს მთავრობის ადმინისტრაციაში. შესაბამისი რეგულაციებით 2019 წლის პირველ იანვრამდე საქართველოს მთავრობის ადმინისტრაციას უნდა განეხორციელებია შესაბამისი დოკუმენტების კლასიფიკაცია, დაარქივება და ასე შემდეგ, შესაბამისი აქტით მიეღო განსაზღვრული ზომები და განეხორციელებია შესაბამისი ღონისძიებები…“, – აღნიშნა საქართველოს პრეზიდენტის ადმინისტრაციის უფროსმა.
პრეზიდენტის ადმინისტრაციის უფროსის თქმით, ექსპრეზიდენტმა სააკაშვილმა საქართველოს მთავრობას უნდა მიმართოს, „რომ მიიღოს დოკუმენტებთან დაკავშირებით განახლებული მდგომარეობა და ჰქონდეს ინფორმაცია ამ დოკუმენტების შესახებ,“ – დასძინა პრეზიდენტის ადმინისტრაციის უფროსმა.
