განათლების სამინისტროს ინფორმაციით, ამ დროისთვის აჭარის სკოლების გარდა სრული დისტანციური სწავლების რეჟიმზე ოთხ ქალაქში – თბილისში, ზუგდიდში, რუსთავსა და ქუთაისში 20 საჯარო სკოლა და 55 სკოლის ცალკეული კლასია გადასული.
„განათლების სამინისტრომ შესთავაზა მოსწავლეებსა და მათ მშობლებს გაეკეთებინათ არჩევანი დისტანციურ სწავლებასა და საკლასო ოთახში სწავლის განახლებას შორის.
დღეისათვის I- VI კლასების 130 000 მოსწავლიდან დისტანციური სწავლების სურვილი 10 000-მდე მოსწავლემ გამოთქვა“, – აცხადებენ სამინისტროში.
სამინისტროში ასევე ადასტურებენ, რომ კოვიდინფიცირების ფაქტები არსებობს მოსწავლეებსა და მასწავლებლებს შორისაც. თუმცა, როგორც სამინისტროში აცხადებენ, საჯარო სკოლებში სისტემატური მონიტორინგი ხორციელდება კოვიდუსაფრთხოების წესებთან დაკავშირებით.
დაავადებათა კონტროლის ეროვნული ცენტრის განცხადებით, დაგეგმილია სკოლის მასწავლებლების შერჩევითი ტესტირება კორონავირუსზე.
აჭარაში კორონავირუსისგან გარდაიცვალა ერთი პედაგოგი.
______________________________
მთავარი ფოტო: „ბათუმელების“ არქივი.