ბათუმში კოვიდდადებითი სტატუსის მქონე უკვე მესამე დედამ გააჩინა ბავშვი, თუმცა აქვთ თუ არა ახალშობილებს კორონავირუსი, ჯერ უცნობია, ტესტის პასუხები რამდენიმე დღეში გახდება ცნობილი.
აშშ-ს დაავადებათა კონტროლისა და პრევენციის ცენტრის (CDC) ცნობით, მიიჩნევა, რომ COVID19-ის გამომწვევი ვირუსი SARS-CoV-2 ახალშობილებს ძირითადად მშობიარობის შემდგომ პერიოდში, დედასთან ან სხვა დაინფიცირებულ პირთან კონტაქტისას, რესპირატორული წვეთებით გადაეცემა.
რამდენიმე საერთაშორისო ანგარიშში გამოთქმულია შეშფოთება ვირუსის შესაძლო საშვილოსნოსშიდა გადაცემის შესახებ, თუმცა ვერტიკალური გადაცემის (ინფექციის ან სხვა დაავადების გადაცემა მშობლებიდან შთამომავლობაზე) მასშტაბი და კლინიკური მნიშვნელობა ჯერ კიდევ გაურკვეველია. საქართველოს ჯანდაცვის სამინისტროს მიერ შემუშავებული COVID19-ის კლინიკური მართვის პროტოკოლის თანახმად, COVID19-ის ვერტიკალური გადაცემა ჯერჯერობით საქართველოშიც არ არის დადასტურებული.
ამავე პროტოკოლისა და ჯანდაცვის მსოფლიო ორგანიზაციის თანახმად, შესაძლო, სავარაუდო ან დადასტურებული COVID19 ინფექციის მქონე დედებისგან დაბადებულ ახალშობილებში ბუნებრივი კვება არ არის აკრძალული, თუმცა ძუძუთი კვებისას აუცილებელია დედებისთვის რესპირაციული ჰიგიენის წესების დაცვა.
„ის მონაცემები, რაც ამ ეტაპზე ხელმისაწვდომია, არ არის საკმარისი იმისთვის, რომ დავასკვნათ COVID-19 ვერტიკალურად გადაეცემა ახალშობილს ძუძუთი კვების დროს. ახალშობილებში COVID-19 ინფექციის რისკი დაბალია, მათთან ინფექცია, როგორც წესი, მსუბუქად ან უსიმპტომოდ მიმდინარეობს, როცა ძუძუთი კვების აკრძალვისა და დედა-შვილის განცალკევების შედეგები შეიძლება უფრო მნიშვნელოვანი იყოს. ამ ეტაპზე ჩანს, რომ COVID-19 ახალშობილებსა და ბავშვებში წარმოადგენს მათი სიცოცხლისა და ჯანმრთელობისთვის გაცილებით უფრო მცირე საფრთხეს, ვიდრე ის ინფექციები, რომელთაგან ძუძუთი კვება იცავს მათ.
ინფექციის პროფილაქტიკისა და კონტროლის ზომების დაცვა აუცილებელია სავარაუდო ან დადასტურებული COVID-19 ინფექციის მქონე დედებსა და მათ ახალშობილებს შორის კონტაქტისას“, – წერს ჯანმო ამ თემაზე.