ქედაში ძლიერი წვიმის გამო მდინარე ბზანა ადიდდა, რის გამოც დაზიანდა ელექტრობოძები, რამდენიმე სოფელი კი ელექტროენერგიის გარეშეა დარჩენილი. სოფელი გულები, ზუნდაგა, კოლოტაური, დაბა ქედა – ეს ის ადგილებია, სადაც მეწყერი განვითარდა, დაბა ქედაში ადიდებულმა მდინარემ სახლებში შეაღწია.
„ბევრი ლოკაციაა, სადაც მეწყრული პროცესებია განვითარებული. დოლოგანში მდინარე ბზანამ წააქცია რამდენიმე ელექტრობოძი, რის გამოც რამდენიმე სოფელს არ მიეწოდება ელექტროენერგია. დაბა ქედაში კი რამდენიმე საცხოვრებელ სახლში ღვარცოფი შევარდა. ახლა იქ ტექნიკა მუშაობს.
ახლა ვართ სოფელ გულებში, სადაც რამდენიმე საცხოვრებელი სახლის მდგომარეობას ვსწავლობთ. სოფელ ზუნდაგაშია ასევე დაზიანებები, კოლოტაურში მუშაობს სალიკვიდაციო შტაბი, საგანგებო სიტუაციების მართვის სამსახურთან ერთად და მიმდინარეობს მდგომარეობის შესწავლა“, – გვითხრეს ქედის მერიის პრესსამსახურში.
დაახლოებით ნახევარი საათი იყო შეზღუდული ბათუმი-ახალციხის მაგისტრალის ზვარეს მონაკვეთზე ავტომანქანების მოძრაობა მეწყრის ჩამოწოლის გამო, თუმცა როგორც მერიაში თქვეს, ამ დროისთვის გზა ცალმხრივად გახსნილია.