თბილისის წიგნის XXII საერთაშორისო ფესტივალი აცხადებს ბლოგერების კონკურსს, რომელშიც ნებისმიერ ბლოგერს შეუძლია მონაწილეობის მიღება. ავტორი უნდა ეხმაურებოდეს 2019-2020 წლებში ქართულ ენაზე გამოცემულ წიგნებს. საკონკურსოდ განიხილება მხოლოდ ის პოსტები, რომლებიც დაიწერა თბილისის წიგნის საერთაშორისო ფესტივალის ბლოგერების კონკურსის ფარგლებში და გამოქვეყნდება 2020 წლის 4 სექტემბრიდან 14 სექტემბრის ჩათვლით.
საუკეთესო ხუთი ბლოგი შევა თბილისის წიგნის XXII საერთაშორისო ფესტივალის ელექტრონულ კატალოგში. ნამუშევრებს შეაფასებს სპეციალური ჟიური.
საკონკურსო ტექსტს აუცილებლად უნდა ახლდეს შემდეგი წარწერა: „დაწერილია საგანგებოდ თბილისის წიგნის XXII საერთაშორისო ფესტივალისთვის“. ასევე, კონკურსის მონაწილეებმა უნდა გამოიყენონ მონიშვნები: GPBA / საქართველოს წიგნის გამომცემელთა და გამავრცელებელთა ასოციაცია Tbilisi International Book Fair / თბილისის წიგნის საერთაშორისო ფესტივალი
ნამუშევრების მიღების ბოლო ვადაა 14 სექტემბერი. საქართველოს წიგნის გამომცემელთა და გამავრცელებელთა ასოციაციამ საუკეთესო სამი ბლოგის ავტორებისათვის დააწესა საგანგებო პრიზები – ვაუჩერები, რომლითაც გამარჯვებულები ფესტივალის ფარგლებში შეძლებენ წიგნების შეძენას.
I ადგილი – 150-ლარიანი ვაუჩერი
II ადგილი – 100-ლარიანი ვაუჩერი
III ადგილი – 50-ლარიანი ვაუჩერი
მონაწილეობისათვის პოსტის ბმული, რომელიც განთავსებული იქნება ავტორის ბლოგზე ან ფეისბუქნოუთის სახით, უნდა გაგზავნოთ ელფოსტის მისამართზე: info@gpba.ge
