საქართველოს განათლების მინისტრის, მიხეილ ჩხენკელის ბრძანებით, ცვლილება შევიდა „ზოგადი განათლების დამადასტურებელი სახელმწიფო დოკუმენტის გაცემის წესის დამტკიცების შესახებ“ კანონში.
ცვლილების მიხედვით, სამოქალაქო რეესტრის სააგენტო ვალდებულია ზოგადი განათლების დამადასტურებელ სახელმწიფო დოკუმენტთან ერთად გასცეს განათლების დამადასტურებელი სახელმწიფო დოკუმენტის ელექტრონული ასლიც, რომელსაც ისეთივე იურიდიული ძალა აქვს, როგორც ორიგინალ დოკუმენტს.
ბრძანების მიხედვით, „მატერიალური დოკუმენტის ელექტრონული ასლი დამოწმდება სააგენტოს ელექტრონული შტამპით და დაინტერესებული პირისთვის ოფიციალურად გასაცნობად, განთავსდება სააგენტოს ოფიციალურ ვებგვერდზე.“
ატესტატის აღება უფასოა ათი დღის ვადაში, იმ შემთხევაში, თუ ათ დღეზე ადრე სურს პირს მისი გატანა, საფასური უნდა გადაიხადოს.
სამოქალაქო რეესტრის სააგენტოს ინფორმაციით, განაცხადის გაკეთების დღეს ატესტატის გატანის შემთხვევაში პირმა უნდა გადაიხადოს 50 ლარი, მეორე დღეს გატანის შემთხვევაში – 40 ლარი, სამ დღეში – 30 ლარი და ხუთ სამუშაო დღეში – 20 ლარი.
სააგენტოს ინფორმაციით, თუ პირი ოფიციალურად არ მიმართავს სააგენტოს, დოკუმენტის ელექტრონულ ასლს ვერ გამოიყენებს. „როცა ატესტატზე განაცხადი კეთდება, განცხადებას აქვს რეგისტრაციის ნომერი და კოდი. შემდეგ, სააგენტოს ვებგვერდზე შესვლისას, შეგიძლიათ ნახოთ რეგისტრირებული განცხადების ელექტრონული ვერსიაც რეგისტრაციის ნომრით და კოდით. შესაბამისად, გამზადებული დოკუმენტის გადმოწერის შესაძლებლობაც იქნება“, – ამბობენ სააგენტოში.
მათივე ინფორმაციით, ელექტრონული სერვისების სარგებლობისას, მომხმარებელს დამატებითი საფასურის გადახდა არ მოუწევს. „ვებგვერდიდან დოკუმენტის ამოღება რა ვადაც აქვს პირს მითითებული, იმაზე ადრე ვერ მოხერხდება. ვებგვერდიდან დოკუმენტის ამოღება უფასო იქნება“, – ამბობენ სააგენტოში.
ბრძანება მიმდინარე წლის 4 აგვისტოს გამოქვეყნდა.
