გონიო-კვარიათში ზღვისპირა ბილიკის [პრომინადის] რეაბილიტაცია და კეთილმოწყობა ბათუმის მერიის გათვლებით 2020 წლის სექტემბერში დაიწყება და ამავე წლის 11 დეკემბრამდე უნდა დასრულდეს.
მერიის საქალაქო ინფრასტრუქტურისა და კეთილმოწყობის სამმართველომ სამუშაოების შესყიდვაზე ტენდერი 6 აგვისტოს გამოაცხადა, წინადადებების მიღება კი 27 აგვისტოს დასრულდება. სამუშაოებისთვის 324 764 ლარია გათვალისწინებული.
ბათუმში, გონიო-კვარიათში, ზღვისპირა ბილიკის რეაბილიტაცია და კეთილმოწყობა გულისხმობს სხვადასხვა სამშენებლო, სადემონტაჟო და სამონტაჟო სამუშაოებს, ასევე: საფარის დაგებას ბეჭდური ბეტონით, ველობილიკის, პანდუსების, ბარიერების, კიბეების, საპარკე სკამების მოწყობას და სანაგვე ურნების განთავსებას.
ტენდერის პირობის მიხედვით, საპარკე სკამის საგარანტიო პერიოდი შეადგენს საბოლოო მიღება-ჩაბარების აქტის გაფორმებიდან 36 თვეს; სხვა დანარჩენ სამუშაოებზე კი – 12 თვეს.
„საგარანტიო პერიოდის განმავლობაში ხარვეზის გამოვლენის შემთხვევაში მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვა ისე, რომ შესრულებული სამუშაოები სრულ შესაბამისობაში იყოს ხელშეკრულებით გათვალისწინებულ პირობებთან“ – აღნიშნულია ტენდერის პირობაში.
მერიის კეთილმოწყობის სამმართველოში „ბათუმელებს“, დაახლოებით 2 თვის წინ, ტენდერის არგამოცხადების მიზეზად კორონავირუსის პანდემია და ქალაქის ბიუჯეტში შემოსავლების შემცირება დაუსახელეს.
„არ ვიცით, როგორი იქნება შემოსავლები, მაგალითად, შემოსავალი იყო კაზინოები, ახლა ყველაფერი გაჩერებული იყო… ამ თვის ბოლომდე უნდა გადაწყდეს, რა თანხას მოგვცემენ, შესაძლოა, გადაიდოს მომავალი წლისთვის,“ – აღნიშნა მაშინ „ბათუმელებთან“ მერიის კეთილმოწყობის სამმართველოს უფროსმა, სულხან ევგენიძემ.
ამ თემაზე:
როდის გაანათებენ გონიოს ბულვარს და დადგამენ სკამებს – მერიაში ფულს ეძებენ
