ვინც თავშესაფარს დატოვებს, უფლება არ აქვს, უკან დაბრუნდეს

ბათუმში  ღამის ორი თავშესაფარი ფუნქციონირებს, ერთი მუნიციპალურია, მეორე კი – კათოლიკური ეკლესიის პატრონაჟის ქვეშ.

როგორც „კარიტასის“ მიერ დაფინანსებულ  ღამის თავშესაფარში „ბათუმელებს“ უთხრეს, მას შემდეგ, რაც ქვეყანაში საგანგებო მდგომარეობა გამოცხადდა, თავშესაფარში მცხოვრებ პირებს უფლება აქვთ, დღის განმავლობაშიც დარჩნენ თავშესაფარში.

„ჩვენ ჩავატარეთ შეხვედრა, გასაგებად ავუხსენით „კარიტასის“ წესები და მოთხოვნები. მათ უფლება აქვთ დღისითაც დარჩნენ თავშესაფარში, მაგრამ ვინც თავშესაფარს დატოვებს, უფლება არ აქვს, უკან დაბრუნდეს“, – გვითხრა თამაზ მღებრიშვილმა, თავშესაფრის ხელმძღვანელმა.

მისი თქმით, ღამის თავშესაფარში დარჩენის სურვილი 17- მა ადამიანმა გამოთქვა,  8 ადამიანი კი ახლობელთან წავიდა.

„გვითხრეს, რომ მთელი დღე აქ ვერ გავჩერდებითო. ეს მათი არჩევანია, რა თქმა უნდა, და გავუშვით. თავშესაფრის ყველა მცხოვრები იზოლირებულია და გარეთ არ გადიან“, – გვეუბნება მღებრიშვილი.

მისი თქმით, თავშესაფარში დარჩენილ ადამიანებს სადილით ბათუმის მერია უზრუნველყოფს.

„საუზმე და ვახშამი აქამდეც ჰქონდათ, ახლა, რადგან დილითაც რჩებიან თავშესაფარში, მივწერეთ მერიას და სადილს მუნიციპალური სასადილოებიდან მოგვაწვდიან.

რაც შეეხება სადეზინფექციო საშუალებებს, „კარიტასმა“ გამოგვიგზავნა ბახილები, ხალათები, ხელთათმანები, პირბადეები, ქუდები, ყველაფერი გვაქვს. თავშესაფარში აქვთ ტელევიზორი, ტენისი, დომინო, კარტი და ერთობიან“, – გვითხრა მღებრიშვილმა.

რაც შეეხება მუნიციპალურ თავშესაფარს, როგორც მერის მოადგილე სოციალურ საკითხებში, ლელა სურმანიძე ამბობს, თავშესაფარში დარჩენა ადამიანებს აქაც შეუძლიათ. მისი თქმით, 30 ადამიანი 21 აპრილამდე კარანტინში დარჩება. „გარეთ არავის არ ვუშვებთ და არც აქვთ სურვილი გარეთ გასვლის“, – გვითხრა მან.

მუნიციპალურ თავშესაფარში მყოფ ადამიანებსაც სამჯერადი კვება ექნებათ. 1-ელი აპრილიდან მუნიციპალური სასადილოები წყვეტენ მუშაობას, თუმცა როგორც ლელა სურმანიძე ამბობს, ერთი სასადილო მაინც იმუშავებს და სწორედ ეს სასადილო მიაწვდის თავშესაფრის ბენეფიციარებს სადილს.

რაც შეეხება დეზინფექციას, სურმანიძის თქმით, თავშესაფარი უზრუნველყოფილია ხსნარებით და აქ მყოფ ადამიანებს შეუძლიათ მისი გამოყენება. „სოციალური დისტანცია მუნიციპალურ თავშესაფარში რთული იქნება, რადგან აქ ერთ ოთახში რამდენიმე ადამიანს უწევს ყოფნა,  ამიტომ  მივეცით მკაცრი რეკომენდაცია, რომ არ გავიდნენ გარეთ“, – ამბობს ლელა სურმანიძე.

მთავარი ფოტო: „ბათუმელების“ არქივი