ბათუმში, ფიროსმანის #18-ში, ექსპლუატაციაში მიღებულ 25-სართულიან საცხოვრებელ სახლს 26-ე სართულს დააშენებენ. მესაკუთრეს შესაბამისი ნებართვა აქვს. პარალელურად, ბათუმის მერიის ქალაქმშენებლობისა და ურბანული პოლიტიკის სამსახური სწავლობს ამ სახლის ამხანაგობის სახელით შესულ საჩივარს, თუმცა საჩივარი მშენებლობის პროცესს ვერ შეაჩერებს.
აქ მცხოვრებლები სახლის ექსპლუატაციის შემდეგ ამხანაგობასთან შეუთანხმებლად მშენებლობის ნებართვის გაცემას აპროტესტებენ. კანონის მიხედვით, ექსპლუატაციაში მიღებული სახლის რეკონსტრუქციის შემთხვევაში, ახალი ნებართვის გაცემამდე, სავალდებულოა ამხანაგობის თანხმობაც.
ეს ის კორპუსია, სადაც 26-ე სართულის დაშენებას, სტუდიის მოწყობის მიზნით, საქართველოს საზოგადოებრივი მაუწყებელი ცდილობდა. სწორედ ამ მიზნით მაუწყებლის მენეჯმენტმა 492,2 კვადრატული მეტრი ფართობი [სხვენი], 88 596 აშშ დოლარად 2017 წელს მშენებელი კომპანიისგან – შპს REAL PALACE -სგან შეისყიდა.
2017 წლის აგვისტოში საზოგადოებრივმა მაუწყებელმა ბათუმის მერიისგან რეკონსტრუქციის ნებართვა მიიღო და 26-ე სართულის დაშენებისა და აქ სტუდიის მოწყობის მიზნით მილიონიანი ტენდერი გამოაცხადა. სახლის რეკონსტრუქციის ნებართვაზე ხელს ბათუმის ყოფილი მერი გიორგი ერმაკოვი აწერს.
2017 წლის ბოლოს საზოგადოებრივმა მაუწყებელმა ფიროსმანის #18-ში ოცდახუთსართულიან სახლზე 26-ე სართულის დაშენების მილიონიანი ტენდერი გამოაცხადა, საბოლოოდ კი ეს პროექტი არ შედგა.
რეესტრის მონაცემებით, ამ დროისთვის ეს ფართობი შმაგი გაბიანს ეკუთვნის, რომელიც ქობულეთში, დაბა ოჩხამურშია რეგისტრირებული. ის ამბობს, რომ მშენებლობის კანონიერი უფლება აქვს, რადგან ნებართვა გაანახლა. მისივე თქმით, მშენებლობას მეზობლები ეწინააღმდეგებიან, რადგან მიიჩნევენ, რომ მას ეს ფართობი კომერციული ობიექტის მოსაწყობად სჭირდება. მეზობლებმა ასევე გვაჩვენეს ბრძანება, რომლითაც დაშენების უფლება მიიღო მოქალაქემ. მსგავს ბრძანებებს ხელს ქალაქის მერი, ლაშა კომახიძე აწერს ხელს.
„არ ვაპირებ არც რესტორნის და არც სხვა რაიმე სახის კომერციულ ობიექტს, ეს იქნება საცხოვრებელი, ვიყიდე კანონიერად, ნებართვაც მაქვს მერიისგან და მეტს ვერაფერს გეტყვით“, – გვითხრა შმაგი გაბიანმა.
„ეს უნდა ყოფილიყო სტუდია, პროექტი არ შეცვლილა და სტუდიაში აპირებს ცხოვრებას? – მე წინააღმდეგი ვარ, რადგან მინდოდა მეცხოვრა ბოლო სართულზე და ვიყიდე ოცდამეხუთე სართულზე, რატომ უნდა დამაშენოს? – ნებართვა რომ გასცა თავის დროზე წინა მერმა, რამდენად კანონიერად გასცა, როცა ჩვენთვის არაფერი უკითხავს?! ეს ყველაფერი გაირკვევა, რამდენად კანონიერია ნებართვა“, – ამბობს ამ სახლის მცხოვრები დიას ჯალაღონია.
საჯარო რეესტრის მონაცემებით, შმაგი გაბიანმა საზოგადოებრივი მაუწყებლის საკუთრებაში არსებული სხვენი 2019 წლის იანვარში დაირეგისტრირა. ამ დროისთვის მშენებლობის ნებართვას, რომელიც საზოგადოებრივმა მაუწყებელმა მოიპოვა, ვადა გასული ჰქონდა. მისი განახლება გაბიანმა 2019 წლის მარტში შეძლო, თუმცა მეზობლებმა მშენებლობის დაწყების საშუალება არ მისცეს. აქ მცხოვრებლების განმარტებით, დაშენების გადაწყვეტილება მერიას არც მაშინ და არც ახლა ამხანაგობასთან არ შეუთანხმებია.
