კორონავირუსის პრევენციის მიზნით, დღეიდან საქართველოში მიკროავტობუსების გადაადგილება შეიზღუდა და ქალაქებში მხოლოდ მუნიციპალური ავტობუსები მოძრაობენ.
ჯანმოს რეკომენდაციის მიხედვით, კორონავირუსის პრევენციისთვის მოქალაქეებმა მინიმუმ 1-2 მეტრის დისტანცია უნდა დაიცვან ერთმანეთისგან, თუმცა ბათუმის რამდენიმე მუნიციპალურ ავტობუსში ამ რეკომენდაციის დაცვა შეუძლებელია, რადგან კონკრეტულ მარშრუტებზე ავტობუსები ხალხითაა სავსე.
„დღეს შედარებით ბევრი მგზავრი იყო. ყველაზე მეტი დატვირთვა აქვს N12 ავტობუსს, რადგან გრძელ მარშრუტზე დადის, დანარჩენი ნომრები სავსე არ არის. კიდევ გავაკეთებთ მონიტორინგს,“ – გვითხრა „ბათუმის ავტოტრანსპორტის“ მარკეტინგის სამსახურის უფროსმა ბესო დათიაშვილმა.
მისივე თქმით, ავტობუსების დამატება გამორიცხულია, რადგან ბათუმს ამდენი მუნიციპალური ავტობუსი არ აქვს:
„ისედაც მაქსიმალურად დატვირთული გრაფიკით ვმუშაობთ. თუ რამე არ შეიცვლება, დავფიქრდებით, რა როგორ გავაკეთოთ,“ – გვითხრა ბესო დათიაშვილმა.
მისივე თქმით, ავტობუსებში ერთმეტრიანი დისტანციის დაცვა შეუძლებელია. „მაშინ ორი კაცი უნდა ავიდეს ავტობუსში ან საერთოდ უნდა გავაჩეროთ მოძრაობა.“
თუ არის რეკომენდაცია იმაზე, რომ ავტობუსში იმდენი მგზავრი იყოს, რამდენი სკამიცაა? – ამ კითხვაზე ბესო დათიაშვილი ამბობს, რომ მგზავრებმა უნდა გაითვალისწინონ მთავრობის რეკომენდაცია და აუცილებლობის გარდა, ტრანსპორტით არ გადაადგილდნენ. „მეც ფეხით გადავადგილდები უკვე,“ – გვითხრა მან.
„ბათუმის ავტოტრანსპორტის“ განცხადებით, მუნიციპალურ ავტობუსებს დეზინფექცია უტარდება. ავტობუსებში მძღოლის დაინფიცირების პრევენციის მიზნით კი, სივრცე ყვითელი ლენტით არის შემოსაზღვრული.
__________________
მთავარ ფოტოზე: N12 ნომერი მუნიციპალური ავტობუსი ბათუმში დღეს. მინდია ფუტკარაძის ფოტო