ახალი ნაგავსაყრელის მშენებლობა ქობულეთში შესაძლოა შეჩერდეს, თუკი სასამართლო დაადგენს, რომ მშენებლობა უკანონოა. ზვიად, თამაზ, ბადრი და მერაბ მგელაძეები სოფელ ცეცხლაურში ცხოვრობენ, სადაც ახალი ნაგავსაყრელის მშენებლობა მთავრობამ 2019 წლის ზაფხულში დაიწყო. ეს მოქალაქეები მიიჩნევენ, რომ მშენებლობა უკანონოა, შეიცავს საფრთხეს და არღვევს მათი საკუთრებას უფლებას. მგელაძეებმა სარჩელით უკვე მიმართეს თბილისის საქალაქო სასამართლოს.
მოპასუხე საქართველოს ეკონომიკისა და მდგრადი განვითარების სამინისტროა, ასევე „ტექნიკური და სამშენებლო ზედამხედველობის სააგენტო“, რომლის გაცემული ნებართვის საფუძველზეც ნაგავსაყრელის მშენებლობა დაიწყო. მოსარჩელეები ამ ნებართვის ბათილად ცნობას ითხოვენ.
„ნებართვა გაცემულია კანონის მოთხოვნათა უხეში დარღვევბით. ამასთან, არსებული ნაგავსაყრელის მშენებლობა არსებული წესით საფრთხეში აგდებს მოსარჩელეთა სიცოცხლესა და ჯანმრთღელობას, მათ საკუთრების უფლებას და განვითარების უფლებას,“ – მიიჩნევს „იურიდიული მრჩევლის“ იურისტი, გიორგი ხიმშიაშვილი. იგი მოსარჩელეების ინტერესებს იცავს სასამართლოში.
ერთ-ერთი მთავარი არგუმენტი, რის გამოც იურისტი მიიჩნევს, რომ ნებართვა უკანონოა, არის მანძილი მოსარჩელეების საკუთრებიდან ახალ ნაგავსაყრელამდე.
„საკუთრებაში არსებულ საცხოვრებელ მიწის ნაკვეთებსა და ნაგავსაყრელის მშენებლობისთვის განკუთვნილ ტერიტორიას შორის მანძილი თითოეულ ინდივიდუალურ შემთხვევაში არ აღემატება 250-300 მეტრს. ცხადია, აღნიშნული ფაქტი, პირდაპირ წინააღმდეგობაში მოდის, საქართველოს მთავრობის 2015 წლის 11 აგვისტოს NN421 დადგენილების „ნაგავსაყრელის მოწყობის, ოპერირების, დახურვისა და შემდგომი მოვლის შესახებ“ ტექნიკური რეგლამენტის დამტკიცების თაობაზე“ მე-9 მუხლის მე-2 პუნქტის მოთხოვნას, რომ მანძილი საცხოვრებელი სახლებიდან ნაგავსაყრელის საზღვრებამდე უნდა იყოს არანაკლებ 500 მეტრი. წარმოდგენილი ფაქტი კი საერთოდ ეჭქვეშ აყენებს მშენებლობის პროცესის კანონიერებას,“ – წერია სარჩელში.
სარჩელის მომზადებამდე მგელაძეებმა საქართველოს ეკონომიკისა და მდგრადი განვითარების სამინისტროს ადმინისტრაციული საჩივრით 2019 წლის სექტემბერში მიმართეს, თუმცა სამინისტროს კანონით გათვალისწინებულ ვადაში წერილობითი გადაწყვეტილება არ მიუღია.
„სამინისტროს „დუმილს“ მივიჩნევთ უარად, რის გამოც მივმართავთ სასამართლოს დარღვეული უფლების დაცვის მიზნით,“ – აღნიშნავენ მოსარჩელეები.
მოსარჩელეების მტკიცებით, „ტექნიკური და სამშენებლო ზედამხედველობის სააგენტომ“ ისე ჩაატარა ადმინისტრაციული საქმისწარმოება ამ საქმეზე, რომ მიმდებარე ტერიტორიაზე მცხოვრებთა კანონიერი ინტერესები არ შეუსწავლია. ასევე, სადავოა ექსპერტიზის დასკვნები, რადგან მიწის კონფიგურაცია არაერთხელ შეიცვალა, ვიდრე საქმისწარმოება დასრულდებოდა – სოფელ ცეცხლაურში ახალი ნაგავსაყრელის მოწყობის საკითხი 2013 წლიდან განიხილება.
ახალი ნაგავსაყრელის მშენებლობა რამდენჯერმე შეფერხდა. ერთ-ერთი პრობლემა 5 მილიონი ლარის მითვისება იყო – 2017 წელს ნაგავსაყრელის მშენებლობისთვის გამოყოფილი ფულის მითვისების ბრალდებით შპს „ჰიგიენა 2009“-ის ყოფილ დირექტორს, ირაკლი ცეცხლაძეს 8 წლით თავისუფლების აღკვეთა მიუსაჯეს.
მთავარი ფოტო: ახალი ნაგავსაყრელის მშენებლობა ქობულეთში, სოფელ ცეცხლაურში. ფოტო „ბათუმელების“ არქივიდან
ამ თემაზე:
როგორ იმუშავებს ახალი ნაგავსაყარი და რა ელის ძველს – ნარჩენების მართვა აჭარაში
